Երկուշաբթի Ալմաթիում մեկնարկել է ՀԱՊԿ անդամ երկրների (Հավաքական անվտանգության պայմանագրի կազմակերպությունը, որը ներառում է Հայաստանը, Բելառուսը, Ղազախստանը, Ղրղըզստանը, Ռուսաստանը եւ Տաջիկստանը) արտգործնախարարների խորհրդի հանդիպումը, հաղորդում է «ՌԻԱ Նովոստի»-ն:
Արդեն ձեւավորված ավանդույթի համաձայն՝ հանդիպումը սկսվեց լուսանկարվելուց: Այնուհետեւ նախարարները (բացի Բելառուսից, Մինսկը ներկայացնում էր փոխարտգործնախարար Անդրեյ Դապկյունասը), ինչպես նաեւ կազմակերպության գլխավոր քարտուղար Յուրի Խաչատուրովը բանակցությունները սկսեցին նեղ կազմով: Արտաքին գործերի նախարարների ներկայիս խորհրդի նախագահը Ղազախստանի ԱԳՆ ղեկավարը Կայրաթ Աբդրահմանովն է:
Բացելով հանդիպումը՝ Աբդրահմանովը շնորհավորեց իր հայ գործընկերոջը՝ Զոհրաբ Մնացականյանին, պաշտոնը ստանձնելու կապակցությամբ, իսկ ՌԴ ԱԳՆ ղեկավար Սերգեյ Լավրովին` առաջիկա պետական տոնի՝ Ռուսաստանի օրվա եւ ֆուտբոլի Աշխարհի գավաթի բացման կապակցությամբ:
Հանդիպումը կշարունակվի պատվիրակությունների մասնակցությամբ ընդլայնված կազմով նիստով: Այնուհետեւ սպասվում է ՀԱՊԿ գլխավոր քարտուղարի եւ Ղազախստանի արտգործնախարարի համատեղ մամուլի ասուլիսը:
Հանդիպման օրակարգում 12 թեմա է ընդգրկված, նախարարները կքննարկեն ընդհանուր անվտանգության ամրապնդմանն ուղղված ՀԱՊԿ-ի մասնակից երկրների համատեղ ջանքերի համակարգման հարցերը: Նախատեսվում է, որ կողմերը նաեւ համատեղ հայտարարություն կստորագրեն «Միջին եւ կարճ հեռահարության հրթիռների վերացման մասին պայմանագրի շուրջ ստեղծված իրավիճակի մասին», որի նախագիծը նախապատրաստել է ռուսական կողմը: