ԱՄՆ նախագահ Դոնալդ Թրամփին եւ Սինգապուրի վարչապետ Լի Սյան Լունին երկուշաբթի բանակցություններից հետո համատեղ ճաշի ժամանակ մատուցել են լոբսթերով ապուր, սթեյք եւ մալայական ավանդական չենդոլ աղանդեր: Ճաշացանկի լուսանկարը Twitter-ի իր էջում տեղադրել է բանակցություններին մասնակցած Սինգապուրի կրթության նախարար Օն Յե Կունը:
Մալայական խոհանոցի ավանդական աղանդեր չենդոլը պատրաստվում է ներկված բրնձային լապշայով, կարմիր լոբով, կոկոսի կաթով եւ արմավի օշարակով: Այն սառույցով են մատուցում:
Սինգապուրյան կողմը Թրամփին առաջիկա տարեդարձի առիթով որպես նվեր տորթ է մատուցել: Տորթով լուսանկարը երկուշաբթի Twitter-ում հրապարակել է Սինգապուրի ԱԳ նախարար Վիվիան Բալակրիշնանը:
«Ծննդյան տարեդարձը ժամկետից մի փոքր վաղ ենք նշում»,- Սինգապուրի ԱԳ նախարարը նշել է լուսանկարին կից գրառման մեջ: Թրամփն իր տարեդարձը նշում է հունիսի 14-ին:
ԱՄՆ նախագահը երկուշաբթի հանդիպում է անցկացրել Սինգապուրի վարչապետ Լի Սյան Լունի հետ, նրանք նախ առանձին են շփվել, այնուհետեւ բանակցությունները շարունակվել են ընդլայնված ձեւաչափով: Դրանց ամերիկյան կողմից մասնակցել են ԱՄՆ պետքարտուղար Մայքլ Պոմպեոն եւ Թրամփի՝ ազգային անվտանգության հարցերով օգնական Ջոն Բոլթոնը:
ԱՄՆ նախագահն ու Սինգապուրի վարչապետը հանդիպել են գագաթնաժողովի նախօրեին: Թրամփի եւ Հյուսիսային Կորեայի առաջնորդ Կիմ Չեն Ընի միջեւ պատմական հանդիպումը տեղի կունենա հունիսի 12-ին սինգապուրյան Սենտոս կղզում գտնվող Capella հյուրանոցում:
