Պետական սեկտորում արդյունավետ ֆինանսական կառավարման համար անհրաժեշտ է ներդնել համապատասխան գործիքներ։ Այս մասին հունիսի 11-ին՝ PEMPAL ցանցի ներքին աուդիտի փորձագիտական հանրության 47-րդ նիստի շրջանակներում կայացած լրագորղների հետ զրույցում հայտնել է Համաշխարհային բանկի Կենտրոնական Ասիայի ֆինանսական կառավարման գծով պատասխանատու, PEMPAL-ի ղեկավար Արման Վաթյանը:
Նրա խոսքով, այդ խնդիրը բնորոշ է նաեւ զարգացած երկրներին․ «Համակարգն արդյունավետ չէ, նմանատիպ խնդիրներ կան ամենուր, օրինակ՝ Ֆրանսիայում, Բելգիայում եւ Բրազիլիայում»,-նշել է Վաթյանը։
Վաթյանի փոխանցմամբ՝ կառավարության հետ համատեղ Համաշխարհային բանկը մշակում է մի օրենսդրական փաթեթ, որով ակնկալվում է զգալիորեն մեծացնել աուդիտորական ընկերությունների որակը: «Հայաստանում ներդրումների ծավալը մեծացնելու համար տրամադրված ինֆորմացիայի նկատմամբ վստահություն պետք է լինի: Աուդիտորական ընկերությունները կարեւոր դեր ունեն այդ վստահության բարձրացման գործում, որովհետեւ ներդրողները, հասկանալով ֆինանսական տեղեկատվության միջազգային չափորոշիչները, ակնկալում են համարժեք տեղեկություններ ստանալ Հայաստանից, դրանք հաստատել վստահելի աուդիտորների կողմից»,-պարզաբանել է նա:
