Դոնալդ Թրամփը եւ Կիմ Չեն Ընը գագաթնաժողովի արդյունքներով համատեղ փաստաթուղթ են ստորագրել: ԱՄՆ-ի եւ Հյուսիսային Կորեայի առաջնորդները շնորհակալություն են հայտնել միմյանց հաջող գագաթնաժողովի համար, փոխանցում է «ՏԱՍՍ»-ը:
Ըստ ԱՄՆ նախագահի՝ Սինգապուրում ստորագրված փաստաթուղթը շատ բազմակողմանի է: «Մենք շատ կարեւոր փաստաթուղթ ենք ստորագրում: Բավականին համապարփակ»,- ասել է նա: «Մենք երկուսս էլ շատ ուրախ ենք այս փաստաթուղթը ստորագրելու պատիվ ունենալու կապակցությամբ», - ավելացրել է ԱՄՆ նախագահը:
Նա խոստացել է, որ Կորեական թերակղզու ապամիջուկայինացման գործընթացը «շատ արագ» կսկսվի: «Գործընթացը շատ արագ կսկսվի»,- պատասխանել է նա լրագրողների համապատասխան հարցին:
Թրամփը հավելել է, որ Վաշինգտոնն ու Փհենյանը «տպավորված կլինեն այն արդյունքներով, որոնց նրանց կհաջողվի հասնել»: «Միացյալ Նահանգների եւ ԿԺԴՀ-ի հարաբերությունները լիովին տարբերվում են նրանից, ինչն եղել է մինչ այժմ»,- նշեց ԱՄՆ ղեկավարը: «Կարծում եմ, որ երկու կողմերն էլ զարմացած կլինեն արդյունքներով: Դրա համար շատ բարի կամք ու աշխատանք է պահանջվել»,- ասել է Թրամփը:
Ըստ Միացյալ Նահանգների առաջնորդի՝ նրան չափազանց դուր է եկել Կիմ Չեն Ընի հետ հանդիպումը: «Մենք միասին հիանալի ժամանակ ենք անցկացրել: Հիանալի հարաբերություններ»,- ասել է նա:
ԱՄՆ նախագահը նաեւ ասել է, որ դեռ «շատ անգամներ» է հանդիպելու է ԿԺԴՀ-ի ղեկավարի հետ: «Մենք դեռ շատ կհանդիպենք»,- ասել է Թրամփը:
ԿԺԴՀ-ի առաջնորդը նշել է, որ աշխարհը պատմական գագաթնաժողովից հետո մեծ փոփոխություններ կտեսնի: «Ցանկանում եմ շնորհակալություն հայտնել նախագահ Թրամփին, որ այս հանդիպումը կայացավ»,- ասել է Կիմ Չեն Ընը: Նա ընդգծել է, որ ԿԺԴՀ-ն եւ ԱՄՆ-ն որոշել են «թողնել անցյալը» եւ «գտնվել նորի շեմին»:
