«Կուտակային կենսաթոշակների մասին» օրենքում լրացումներ կատարելու մասին» օրինագիծը մի կողմից տնտեսական, մյուս կողմից քաղաքական որոշում է: Այս մասին NEWS.am-ի թղթակցի հետ զրույցում ասաց տնտեսագիտության դոկտոր Թաթուլ Մանասերյանը:
Նրա գնահատմամբ՝ կենսաթոշակային բարեփոխումների անցկացման որոշումը լիովին հիմնավորված է:
«Պետք է մեղմացնել հարկատուների բեռը, քանի որ հակառակ դեպքում պետությունը պարզապես ստիպված կլինի բարձրացնել հարկերը` թոշակառուների թոշակներն ապահովելու համար, որոնց թիվը տարեցտարի աճում է. չէ որ բնակչությունը ծերանում է»,-ասաց տնտեսագետը:
Հիշեցնենք, որ հունիսի 11-ին ՀՀ կառավարության արտահերթ նիստին հավանություն տրվեց «Կուտակային կենսաթոշակների մասին» օրենքում փոփոխություններ կատարելու մասին» օրինագծին, որը ենթադրում է, որ մասնավոր հատվածում կենսաթոշակային կուտակային համակարգի պարտադիր բաղադրիչը ուժի մեջ կմտնի 2018 թվականի հուլիսի 1-ից՝ չնայած ավելի վաղ արված բոլոր հավաստիացումներին:
Բացի այդ, կառավարությունը, հավաստիացնելով, որ ձգտում է մեղմել բնակչության համար հարկային բեռի անխուսափելի ավելացումը, լրացում էր նախաձեռնել, որի համաձայն ժամանակավորապես կկրճատվի քաղաքացիների թիվն ընդհանուր գումարում, որը փոխանցվում է կուտակային կենսաթոշակային ֆոնդին: Ըստ գործող կանոնակարգի՝ մարդը կուտակում է եկամտի 10 տոկոսը, 5 տոկոսը վճարում է ինքը՝ աշխատողը, իսկ «կեղտոտ» աշխատավարձի 5 տոկոսը փոխանցում է պետությունը: Ըստ առաջարկվող փոփոխությունների՝ 2.5 տոկոսը կփոխանցի աշխատակիցը, իսկ 7.5 տոկոսը՝ պետությունը. օրինակ, 200000 դրամ աշխատավարձի դեպքում, ըստ օրինագծի, քաղաքացին 5000 դրամ (2.5 տոկոս) կփոխանցի, իսկ պետությունը` 15000 (7.5 տոկոս): Այս տոկոսադրույքները կգործեն մինչեւ Հարկային օրենսգրքում փոփոխությունների ուժի մեջ մտնելը: