ՀՀ արդարադատության նախարարի տեղակալ Վիգեն Քոչարյանն այսօր մասնակցել է Հայաստան–Եվրոպայի խորհուրդ 2015-2018 թվականների գործողությունների ծրագրի ամփոփիչ հանդիպմանը:
Իր ելույթում Վիգեն Քոչարյանը շնորհակալական խոսք է հղել ԵԽ գործընկերներին սերտ համագործակցության համար՝ ընդգծելով, որ ԵԽ երեւանյան գրասենյակն առանցքային գործընկեր է Արդարադատության նախարարության կողմից վերջին տարիներին իրականացված բոլոր բարեփոխումների համար:
Փոխնախարար Քոչարյանը նշել է, որ ազգային մակարդակում մարդու իրավունքների եվրոպական չափանիշների արդյունավետ կիրառումը կարեւոր օրախնդիր է Հայաստանի համար, որի ուղղությամբ Արդարադատության նախարարությունն իրականացրել է ծավալուն օրենսդրական աշխատանքներ: Փոխնախարարը միաժամանակ կարեւորել է առկա օրենսդրական գործիքակազմի արդյունավետ կիրառման հմտությունների եւ հնարավորությունների զարգացումը՝ ընդգծելով այդ համատեքստում եւս ԵԽ գործընկերների հետ սերտ համագործակցության անհրաժեշտությունը:
Իր խոսքում փոխնախարար Քոչարյանն անդրադարձել է նաեւ Մարդու իրավունքների եվրոպական դատարան քաղաքացիների բողոքների խնդրին, քրեական արդարադատության ոլորտում նոր օրենսդրական փոփոխությունների ընթացքին, խափանման միջոցների կիրառման հետ կապված հարցերին, կորուպցիայի դեմ պայքարին, ընտանեկան բռնության մասին ՀՀ օրենքով նախատեսված մեխանիզմների իրագործման, ինչպես նաեւ Անձնական տվյալների պաշտպանության գործակալության ինտիտուցիոնալ կայացման եւ կարողությունների զարգացման անհրաժեշտություններին:
Վիգեն Քոչարյանը վստահեցրել է, որ առկա են բոլոր նախադրյալները համագործակցության մեծ ներուժն իրացնելու 2019-2022 թվականների Հայաստան-ԵԽ նոր գործողությունների ծրագրի շրջանակներում :