Բնապահպանության նախարար Էրիկ Գրիգորյանը հանդիպել է Հայաստանում Իրանի Իսլամական Հանրապետության արտակարգ եւ լիազոր դեսպան Սեյեդ Քազեմ Սաջադիի հետ։
Ողջունելով դեսպանին՝ բնապահպանության նախարարը նշել է, որ Հայաստանի եւ Իրանի միջեւ բնապահպանության ոլորտում համագործակցության մեծ ներուժ կա, որը սակայն լիարժեք չի օգտագործվում եւ հայտնել Հայաստանի պատրաստակամությունը բարեկամական Իրանի հետ կիսելու բնապահպանական առանձին խնդիրների` կլիմայի, բնապահպանական վճարների համակարգի ձեւավորման ուղղությամբ ունեցած փորձը։
Դեսպան Սեյեդ Քազեմ Սաջադին, շնորհակալություն հայտնելով հանդիպման համար, իր հերթին կարեւորել է ոլորտում երկու երկրների համագործակցության ընդլայնումը։
Հանդիպման ընթացքում անդրադարձ է եղել նաեւ երկու երկրների սահմանին «Բարեկամության եւ խաղաղության այգի» հիմնելու ծրագրին, ԻԻՀ շրջակա միջավայրի վարչության աջակցությամբ Հայաստան ազնվացեղ եղջերուի 3 առանձնյակի ներմուծման հաջողված աշխատանքներին, ինչպես նաեւ Հայաստանի կողմից Իրանին կենդանիների մոնիթորինգի սարքեր տրամադրելու գործընթացին:
Կողմերը քննարկել են նաեւ Արաքս գետի ջրի որակին, մոնիթորինգի իրականացմանը, արտանետումների աղբյուրների լիարժեք բացահայտմանը վերաբերող հարցեր:
