ԱՄՆ-ի եւ Հյուսիսային Կորեայի առաջնորդներ Դոնալդ Թրամփը եւ Կիմ Չեն Ընը լրագրողներին հայտնել են Սինգապուրում կայացած գագաթնաժողովի առաջին արդյունքների մասին: Հյուսիսային Կորեայի առաջնորդը հայտարարել է, որ «աշխարհը խոշոր փոփոխություններ կտեսնի», իսկ Թրամփը հյուսիսկորեացի գործընկերոջը Վաշինգտոն հրավիրելու պատրաստակամություն է հայտնել, փոխանցում է «Դոժձ»-ը:
Կիմ Չեն Ընի խոսքով՝ ԱՄՆ նախագահի հետ «պատմական հանդիպման» ժամանակ իրենք որոշել են «անցյալը թողնել հետեւում», հաղորդում է Associated Press-ը: Թրամփը խոստացել է, որ Հյուսիսային Կորեայի ապամիջուկայնացումը կսկսվի «շատ շուտով»: Լրագրողի հարցին, թե արդյոք նա Հյուսիսային Կորեայի առաջնորդին կհրավիրի Վաշինգտոն բանակցություններ համար, ԱՄՆ նախագահն ասել է. «Իհարկե»:
Թրամփը պատմել է, որ իր եւ Կիմ Չեն Ընի միջեւ «հատուկ կապ է հաստատվել»: Նա ԿԺԴՀ-ի ղեկավարին «շատ տաղանդավոր մարդ» է անվանել, ով «շատ է սիրում իր երկիրը»: Կիմ Չեն Ընն իր հերթին շնորհակալություն է հայտնել ԱՄՆ նախագահին հանդիպման համար եւ հայտարարել, որ «աշխարհը մեծ փոփոխություններ կտեսնի»:
Դրանից առաջ Թրամփը եւ Կիմ Չեն Ընը վերջնական փաստաթուղթ էին ստորագրել, որի բովանդակության մասին պաշտոնապես չի հաղորդվել: Թրամփն այն «բավականին համապարփակ» է անվանել: CNN-ի փոխանցմամբ՝ փաստաթղթում երկրի ղեկավարները հաստատել են բանակցությունների առաջընթացը եւ խոստացել են հետեւել հարաբերությունների բարելավման ուղուն: