Միացյալ Նահանգների եւ Հյուսիսային Կորեայի առաջնորդների գագաթնաժողովը ցույց տվեց, որ Կորեական թերակղզու ամբողջական եւ անդառնալի ապամիջուկայնացման նպատակին կարելի է հասնել: ԵՄ-ն պատրաստ է աջակցել հետագա բանակցություններին եւ ջանքեր գործադրել վստահության ամրապնդման համար: Այս մասին երեքշաբթի հայտարարել է եվրոպական դիվանագիտության ղեկավար Ֆեդերիկա Մոգերինին, փոխանցում է «ՌԻԱ Նովոստի»-ն:
«Այսօր ԱՄՆ-ի եւ ԿԺԴՀ-ի ղեկավարների միջեւ կայացած գագաթնաժողովը հաստատում է մեր խորը համոզմունքը, որ դիվանագիտությունը միակ ճանապարհն է Կորեական թերակղզում ամուր խաղաղության հասնելու համար»,- ասել է Մարգարինին:
Նրա խոսքով՝ այս գագաթնաժողովը կարեւոր եւ անհրաժեշտ քայլ է միջկորեական հարաբերությունների եւ թերակղզում ձեռք բերված դրական իրադարձությունների զարգացման մեջ:
«Վերջնական նպատակը, որը կիսում է ողջ միջազգային հանրությունը եւ ՄԱԿ-ի Անվտանգության խորհուրդը, մնում է Կորեական թերակղզու ամբողջական, հաստատելի եւ անշրջելի ապամիջուկայնացումը: ԱՄՆ-ի եւ ԿԺԴՀ-ի ղեկավարների ստորագրած համատեղ հայտարարությունը հստակ ազդանշան է առ այն, որ այդ նպատակը կարող է իրական դառնալ»,-ասել է նա:
