Գերմանիայի Բունդեսթագի արտաքին քաղաքականության կոմիտեի նախագահ Նորբերթ Ռեթգենը (Քրիստոնեա-դեմոկրատական միություն) զուսպ է արձագանքել ԱՄՆ եւ Հյուսիսային Կորեայի առաջնորդներ Դոնալդ Թրամփի եւ Կիմ Չեն Ընի հանդիպման արդյունքներին, փոխանցում է ՏԱՍՍ-ը:
«Ինչպես նախկինում, քիչ հավանական է այն, որ Կիմ Չեն Ընը մտադիր է հրաժարվել ատոմային զենքի մշակման իր ծրագրից»,- երեքշաբթի Funke Mediengruppe-ին ասել է քաղաքական գործիչը:
Ռեթգենի կարծիքով՝ «պատմական արդյունքի հասնելու իր անձնական պահանջմունքով Թրամփը ԱՄՆ-ին դրել է թույլ կողմի դիրքում»: Միեւնույն ժամանակ Հյուսիսային Կորեայի առաջնորդի համար հանդիպումը «անհավանական հաջողություն է, որի համար նա նույնիսկ ստիպված չեղավ փոխադարձության դիմել», կարծում է Բունդեսթագի արտաքաղաքական կոմիտեի ղեկավարը:
Անվտանգության հարցերով Մյունխենի համաժողովի ղեկավար Վոլֆգանգ Իշինգերն իր հերթին SWR ռադիոհեռուստատեսային ընկերության հետ հարցազրույցում նշել է, որ «հարց է ծագում՝ արդյոք բոլորը կհետեւե՞ն պայմանավորվածություններին», որոնք ձեռք են բերվել բանակցություններում: