Բնական է, որ Բելառուսի կողմից Ադրբեջանին զենք վաճառելը մեզ չի կարող չմտահոգել եւ չի կարող չբարձրաձայնվել։ Այս մասին այսօր՝ հունիսի 12–ին լրագրողների հետ զրույցում նշեց արտաքին գործերի նախարարի տեղակալ Շավարշ Քոչարյանը։
«Բելառուսը մեզ հետ կաշկանդված է համաձայնագրերով, ՀԱՊԿ անդամ է, ՀԱՊԿ–ում կա որոշակի իրավապայմանագրային դաշտ, դա պարտավորեցնում է նրան պահել այնպես, ինչպես դաշնակիցը։ Տվյալ պարագայում այդ քայլը հակասում է այդ պարտավորությանը»,–նշել է նա։
Քոչարյանի համոզմամբ՝ դա ոչ միայն Բելառուսին է վերաբերում, դա ընդհանուր խնդիր է նույնիսկ ՀԱՊԿ անդամ երկրներից դուրս։
Փոխնախարարը նաեւ շեշտեց՝ չկա պայամանգրի այնպիսի կետ, որն արգելում է զենք վաճառել ոչ ՀԱՊԿ անդամ պետությանը, բայց կա անուղղակի, մասնավորապես, որ արգելվում է անել գործողություններ, որոնք վնասում են ՀԱՊԿ գործընկերոջը։
Բոլոր հարցերի բանալին, նրա համոզմամբ, երկրի ներսում է գտնվում. «Պետություններն առաջին հերթին առաջնորդվում են իրենց շահերով, եւ որպեսզի չոտնահարեն այլ պետության շահերը, պետք է այդ պետությունը, որի շահերը ոտնահարվում են, ավելի ազդեցիկ լինի»։
Շավարշ Քոչարյանն ընդգծեց՝ Հայաստանը որքան ավելի հեղինակավոր լինի, ավելի հասկանալի լինի, ավելի ընդունելի լինի արտաքին աշխարհի համար, ինչքան կարողանա արժանապատիվ լինել, այնքան «մենք կկարողանանք հետամուտ լինել մեր ազգային խնդիրների իրականացմանը»։
