2017 թվականին տնտեսական ակտիվության արագացումը պայմանավորված էր արդյունաբերության եւ ծառայությունների ճյուղերում աճի բարձր տեմպերով, շինարարության ճյուղի աճի վերականգնմամբ: Այս մասին, այսօր՝ հունիսի 13-ին, ԱԺ-ում ՀՀ 2017 թվականի պետական բյուջեի կատարման տարեկան հաշվետվությունը ներկայացնելիս հայտարարեց ՀՀ կենտրոնական բանկի փոխնախագահ Ներսես Երիցյանը՝ հավելելով, որ արդյունքում տնտեսական աճը 2017-ին 7,5 տոկոս է կազմել նախատեսված 3,2 տոկոսի փոխարեն:
«Այդ աճի մեջ ներքին գործոնների շարքում են ԿԲ կողմից վերջին մի քանի տարիներին իրականացվող խթանող դրամավարկային քաղաքականությունը, տնտեսության վարկավորման աճը, արտահանմանն ու ներդրումների խթանմանն ուղղված կառավարության քաղաքականությունը»,-ասաց նա:
Երիցյանի խոսքով, 2017 թվականին աճել է թե սպառման պահանջարկը, թե ներդրումների պահանջարկը. «Գնաճի ցածր եւ կառավարելի մակարդակը հնարավորություն է ստեղծել այդ աճին զուգընթաց պահպանել եկամուտների գնողունակությունը: Շարունակվել է ցածր մակարդակի վրա մնալ մեր արտաքին հաշվեկշիռը՝ 3-3,5 տոկոսի սահմաններում:
Թեեւ 2017 թվականին բյուջեի ծախսերն ավելացել են, սակայն ՀՆԱ-ն ավելի արագ է աճել եւ ծախսերը ՀՆԱ ցուցանիշում տեսակարար կշռով նվազել են»,-ընդգծեց Ներսես Երիցյանը:
