Անհուսալի վարկերը հավասարապես բաշխվում են բոլոր վարկառուների վրա, այդպիսի վարկերի տեսակարար կշիռը Հայաստանի բանկային համակարգում 3 տոկոսից ավելի է: Այս մասին, այսօր՝ հունիսի 13-ին, ԱԺ-ում ՀՀ 2017 թվականի պետական բյուջեի կատարման տարեկան հաշվետվությունը ներկայացնելիս հայտարարեց ՀՀ կենտրոնական բանկի փոխնախագահ Ներսես Երիցյանը:
Նրա խոսքով, չմարված վարկերի հետ կապված գործընթացները եւ բարդությունները վերացնելու ուղղությամբ քայլեր պետք է արվեն, որպեսզի կարողանանք այդ տոկոսը նվազեցնել:
«Անհուսալի վարկերի տույժ-տուգանքների զիջման գաղափարն էլ է այդ դաշտից, որ մեկ անգամ մաքրելով համակարգը, առանց լրացուցիչ ծախսերի բանկային համակարգի վրա, մենք նպաստում ենք այդ վարկերի վերադարձելիությանը: Բանկերը միշտ պատրաստ են եղել լուծել այդ խնդիրը վարկառուների համար, ուղղակի եթե զիջում էր մեկ մլն դրամ, պետք է 200 հազար դրամի հարկ վճարեր բանկը: Հիմա բարեբախտաբար, այդ հարցը լուծվում է»,-հայտարարեց ԿԲ փոխնախագահը:
ՀՀԿ խմբակցության պատգամավոր Խոսրով Հարությունյանը նկատեց, որ վարկերի տոկոսները նվազեցնելը խնդիրը չի լուծի, եթե վարկ վերցնող մարդկանց արտադրանքը մրցունակ չլինի. «Նրանք էլի չեն վճարելու վարկերը եւ 3 տարի հետո նորից զիջելու ենք»:
Ներսես Երիցյանը հայտարարեց, որ այսօր, բարեբախտաբար, բանկերն ունենա այն ունակությունը, որ ռիսկերը գնահատեն. «Այս պահին բավականին խելամիտ վարկավորում են իրականացնում»:
Նշենք, որ կառավարությունը հանդես է եկել անհուսալի վարկերի տույժ-տուգանքները ներելու նախաձեռնությամբ: