Մանե Թանդիլյանի՝ ՀՀ աշխատանքի եւ սոցիալական հարցերի նախարարի պաշտոնից հրաժարականի հարցը կուսակցությունում չի քննարկվել, եւ այդ որոշումը կայացրել է ինքը՝ Թանդիլյանը: Այս մասին հունիսի 13-ին Ազգային ժողովում լրագրողների հետ զրույցում ասաց «Ելք» դաշինքի պատգամավոր, «Լուսավոր Հայաստան» կուսակցության ղեկավար Էդմոն Մարուքյանը:

Նրա խոսքով՝ Թանդիլյանի այս որոշումը պայմանավորված էր անձնական հանգամանքներով: «Դա անակնկալ էր կուսակցության համար: Բայց, միեւնույն ժամանակ, ես մեծ հարգանքով եմ վերաբերվում Թանդիլյանի որոշմանը»,- բացատրեց Մարուքյանը: Պատգամավորի խոսքով՝ Թանդիլյանն առաջին հերթին իր ընկերն է, գործընկերը, քաղաքական զինակիցը, ուստի որոշումն ինքը բավական ցավոտ է ընդունել:

Հիշեցնենք, որ Մանե Թանդիլյանը կտրուկ անհամաձայնություն էր հայտնել վարչապետ Նիկոլ Փաշինյանի դիրքորոշման հետ, ով իշխանության գալուց հետո ամբողջությամբ փոխել է իր տեսակետը պարտադիր կուտակային կենսաթոշակային համակարգի ներդրման վերաբերյալ: Թանդիլյանը նաեւ հեռացել է «Լուսավոր Հայաստան» կուսակցության շարքերից:

Մանե Թանդիլյանը հրաժարական ներկայացրեց