Կառավարությունը պետք է մտածի այն մասին, որ Հայաստանում պարտադիր կուտակային կենսաթոշակային համակարգը բոլորի համար հավասարաչափ գործի: Այս մասին հունիսի 13-ին ԱԺ-ում լրագրողների հետ զրույցում ասաց «Ելք» դաշինքի պատգամավոր Էդմոն Մարուքյանը:
Նրա խոսքով՝ իսկ եթե դա չի ապահովվում, ապա այդ համակարգից պետք է հրաժարվել: «Նախօրեին վարչապետ Նիկոլ Փաշինյանը հայտարարեց, որ եթե Սահմանադրական դատարանը քննարկման արդյունքում ընդունի, որ պարտադիր կուտակային համակարգը հակասում է Հիմնական օրենքին, ապա դրանից կհրաժարվեն»,- հավելեց Մարուքյանը:
Հիշեցնենք, որ կառավարության հունիսի 11-ի արտահերթ նիստում հավանություն ստացավ «Կուտակային կենսաթոշակների մասին» օրենքում լրացումներ կատարելու մասին» օրինագիծը, որով նախատեսվում է, որ կուտակային կենսաթոշակային համակարգի պարտադիր բաղադրիչը մասնավոր հատվածի համար ուժի մեջ կմտնի 2018 թվական հուլիսի 1-ից, չնայած նախկին բոլոր հավաստիացումներին:
