Պարտադիր կուտակային բաղադրիչի մեկ տոկոսի պահպանման պարագայում էլ համարելու ենք, որ հարցը չի լուծվել։ Այս մասին այսօր՝ հունիսի 13-ին լրագրողների հետ զրույցում հայտարարեց ԱԺ ՀՅԴ խմբակցության ղեկավար Արմեն Ռուստամյանը՝ մեկնաբանելով պարտադիր կուտակային բաղադրիչի հարցով իրենց դիրքորոշումը:
«Պարտադիր բաղադրիչի հարցը պետք է լուծվի։ Ինքը՝ վարչապետն արձանագրել է, որ խնդիրն առկա է, սահմանադրականության խնդիր կա: Մենք հիմա, ըստ էության, գնում ենք այն ճանապարհով, որ նպատակ ենք դնում այդ հարցը լուծել արդարացիորեն եւ սահամանադրության նորմերի մեջ տեղավորելով»,- ասաց պատգամավորը:
Արմեն Ռուստամյանի համոզմամբ՝ կառավարության որոշումը պարտադիր բաղադրիչի մեղմացման մասին միջանկյալ քայլ էր: «Մենք կողմ չենք լինելու այդ գործընթացին: Մեկ տոկոս էլ մնա պարտադիր բաղադրիչի հետ կապված, համարելու ենք, որ հարցը չի լուծվել։ Մենք պայքարելու ենք, գնալու ենք նրան, որ պարտադիր բաղադրիչն ի վերջո հանվի»,- եզրափակեց նա: