Երեւանի ընդհանուր իրավասության դատարանի Շենգավիթի նստավայրում «Սասնա ծռերի» գործով այսօր՝ հունիսի 13-ին ՊՊԾ գնդի տարածքի գրավման ժամանակ սպանված ոստիկան Գագիկ Մկրտչյանի այրին՝ Հասմիկ Ոսկանյանը, դեմ արտահայտվեց «Սասնա ծռերի»-ի անդամների խափանման միջոցը փոխելուն։
Նա հայտարարեց, որ արդարացի չէ «Սասնա ծռեր» խմբի անդամներին ազատ արձակելը, քանի դեռ դատաքննությունը չի ավարտվել եւ գործի հանգամանքներն ամբողջովին չեն բացահայտվել։ «Ես անքան էլ վատ մարդ չեմ, չեմ առարկում, որ առողջական խնդիրներ ունեցողներն ազատության մեջ լինեն, բայց դեմ եմ, որ մնացածների խափանման միջոցը փոխվի, թող գաղութում իրենց պատիժը կրեն, մինչեւ դատարանի որոշումը կլինի։ Ինչքան էլ տեղը վատ լինի, իմ ամուսնու տեղից վատը չի լինի»,-ասաց նա։
Սեդրակ Նազարյանը ցավակցեց սպանված ոստիկանների այրիներին եւ նշեց, որ իրենք էլ են շահագրգռված, որ բացահայտվեն դեպքի իրական հանգամանքները։
«Սասնա ծռեր»-ի անդամ Սեդրակ Նազարյանի նկատմամբ ընտրված խափանման միջոց կալանավորումը փոխելու եւ նրան անձնական երաշխավորությամբ ազատ արձակելու մասին միջնորդությունը քննարկելու նպատակով դատավոր Մեսրոպ Մակյանը հեռացավ խորհրդակցական սենյակ, որոշումը կհրապարակվի ժամը 16։00-ին։
Հիշեցնենք, որ Սեդրակ Նազարյանի խափանման միջոցը փոխելու հարցով երաշխավորել են ԱԺ «Ծառուկյան» խմբակցության պատգամավորներ Նաիրա Զոհրաբյանն ու Վահե Էնֆիաջյանը։
Գործով մեղադրող Պետրոս Պետրոսյանը հայտարարեց, որ չի առարկում միջնորդությանը, նաեւ հաշվի առնելով առողջական վիճակն ու ընտանեկան վիճակը առարկություններ չունի։