Իրանական միջուկային համաձայնագրի չեղարկման դեպքում Իրանը կվերսկսի ուրանի հարստացման գործընթացը Ֆորդոյի իր միջուկային օբյեկտում: Այդ մասին հայտարարել է Իրանի ատոմային էներգիայի կազմակերպության մամուլի քարտուղար Բեքրուզ Քամալվանդին, փոխանցում է Tasnim-ը: Նրա խոսքով՝ համաձայնագրի ձախողման դեպքում Նաթանզեի միջուկային օբյեկտը կսկսի ավելի մեծ հզորությամբ նորագույն ժամանակակից ցենտրիֆուգների արտադրությունը:
Կենտրոնական Ղոմի նահանգում տեղակայված Ֆորդոն գտնվում է գետնի տակ՝ այն ցանկացած ռազմական հարձակումներից պաշտպանելու համար:
2011 թվականի վերջում Ֆորդոյի գործարանը սկսել էր մինչեւ 20 տոկոս հարստացված ուրան արտադրել: Սակայն Իրանի միջուկային համաձայնագրի ստորագրումից հետո Իրանն միայն մինչեւ 5 տոկոս հարստացված ուրան է արտադրում: