Ոստիկանության պաշտոնատար անձին մեղադրանք է առաջադրվել ամբաստանյալին խոշտանգելու համար։ Այս մասին NEWS.am-ին տեղեկացրեցին ՀՀ հատուկ քննչական ծառայության (ՀՔԾ) լրատվական ծառայությունից:
Երևան քաղաքի Ավան և Նոր Նորք վարչական շրջանների ընդհանուր իրավասության դատարանում ՊՊԾ գնդի զինված զավթման մեջ մեղադրվող կալանավորված անձանց և ՀՀ ոստիկանության աշխատակիցների միջև տեղի ունեցած միջադեպի առթիվ ՀՀ հատուկ քննչական ծառայությունում հարուցված քրեական գործի շրջանակներում ՀՀ քրեական օրենսգրքի 309.1-րդ հոդվածի 2-րդ մասի 4-րդ կետով մեղադրանք է առաջադրվել ՀՀ ոստիկանության Երևան քաղաքի վարչության ուղեկցող գումարտակի հրամանատար Ա. Ղ.-ին հանրորեն վտանգավոր այն արարքի կատարման համար, որ նա, ամբաստանյալ Գագիկ Եղիազարյանի կողմից դժգոհություն հայտնելու ըմբոստության համար նրան պատժելու նպատակով մտել է վերջինիս խուց, ապտակել դեմքին, որից հետո ՀՀ ոստիկանության ուղեկցող գումարտակի այլ ծառայողների հետ միասին ձեռքերով և ոտքերով հարվածներ հասցրել Գագիկ Եղիազարյանի մարմնի տարբեր հատվածներին` նրան դիտավորությամբ պատճառելով մարմնական վնասվածքներ:
Նախաքննությունը շարունակվում է:
Ավելի վաղ «Սասնա ծռեր» խմբի անդամ Գագիկ Եղիազարյանի փաստաբան Դավիթ Գյուրջյանը հայտնել էր, որ 2017թ. հունիսի 28 –ին ոստիկանության ուղեկցող գումարտակի հրամանատար Արմեն Ղազարյանի ղեկավարությամբ դատարանի շենքում բռնություն կիրառվեց «Սասնա ծռեր» խմբի անդամների նկատմամբ: Բռնության ենթարկվածների թվում էր նաև Գագիկ Եղիազարյանը:
