Հողի հարկի՝ տարիներով կուտակված պարտքերի զիջումների հարց կառավարությունը չի քննարկել: Այս մասին, այսօր՝ հունիսի 13-ին, ԱԺ-ում կառավարության հետ հարցուպատասխանի ժամանակ հայտարարեց ֆինանսների նախարար Ատոմ Ջանջուղազյանը:
ՀՀԿ խմբակցության պատգամավոր Ռուստամ Մախմուդյանը դիմելով Ջանջուղազյանին՝ ասաց, որ վերջին շրջանում համաքաղաքացիները հանդիպումների ժամանակ պնդում են, որ հողի հարկի՝ տարիներով կուտակված պարտքերի մասով կառավարությունը հավանաբար զիջումներ ու արտոնություններ է սահմանելու. «Ունի՞ կառավարությունը նման նպատակ, որ զիջումներ կատարի, որովհետեւ դա իրականում որոշակի շփոթ է առաջացրել մեր հասարակության շրջանում»:
Ի պատասխան Ֆինանսների նախարարն ասաց. «Ցավոք, շատ հաճախ ցանկալին իրականության տեղ փորձ է արվում ներկայացնել, այս դեպքում նույնպես որպես ցանակություն է հավանաբար արտահայտվել, որովհետեւ նման քննարկում առայժմ տեղի չի ունեցել: Բայց մենք ընդհանրապես հարկային համակարգը քննարկելու, վերլուծելու եւ գնահատելու փուլում ենք գտնվում եւ ակնկալում ենք, որ ձեզ հետ միասին կգտնենք ճիշտ փոխզիջումային տարբերակը, որը օբյեկտիվորեն ծառացած է եւ չի խոչընոտի տնտեսավարմանը»: