Հայաստանում մենաշնորհների վերացման հարցի լուծման համար կա երկու բաղադրիչ՝ քաղաքական եւ ինստիտուցիոնալ: Այս մասին, այսօր՝ հունիսի 13-ին, ԱԺ-ում կառավարության հետ հարցուպատասխանի ժամանակ հայտարարեց փոխվարչապետ Տիգրան Ավինյանը:
«Ծառուկյան» խմբակցության պատգամավոր Սերգեյ Բագրատյանը դիմելով կառավարությանն ասաց. «մարդիկ ուզում են հասկանալ՝ հայտարարված մենաշնորհների վերացումը գործում է, թե ոչ: Ենթադրում եմ, որ մենաշնորհների վերացման ամրագրումը պետք է ամրագրված լինի կառուցակարգերով: Ներդրումային ակնկալիքներ ստեղծելու համար պետք է ստեղծել հարթակներ, որտեղ կնշվի, թե 20 ապրանքատեսակներից քանիսն են մենաշնորհներից ազատվել, որ այլեւս կարող է ցանկացած տնտեսվարող ներմուծել, արտադրել ինչ ուզում է»,-ասաց Բագրատյանը:
Ի պատասխան Ավինյանը նշեց. «Քաղաքական մասով որեւէ մեկի մոտ կասկած չի մնացել, որ հարցը լուծված է: Այսինքն քաղաքական ազդեցության տակ մենաշնորհներ չկան եւ չեն լինելու: Ինստիտուցիոնալ մասով պետք է գործեն համապատասխան մարմինները: Դրանցից մեկը ՏՄՊՊՀ-ն է եւ այլ մարմիններ, որոնք սկսել են գործել եւ արդյունքներ ցույց են տալիս: Մեծ հաճույքով կուզենայի լսել ձեր առաջարկները այս մասով»:
Բագրատյանն էլ նշեց,. «Ես վստահ եմ, որ քաղաքական կամքը ապահովված է: Բայց իրական կյանքում պետք է կարողանանք հաջորդ քայլերն իրականացներ: Պետք է ստեղծել հնարավորություն, որ որեւէ մեկի մոտ չլինի կասկած այդ առումով: Շատ կարեւոր է հանրային իրազեկումը: Ես գրավոր կներկայացնեմ առաջարկներ»:
