«Սասնա ծռեր» խմբի անդամ Արթուր Մելքոնյանն ազատ արձակվեց:
NEWS.am-ի թղթակիցը հաղորդում է, որ Երեւանի ընդհանուր իրավասության դատարանի Ավանի եւ Նոր Նորքի նստավայրում այսօր՝ հունիսի 14-ին, նախագահող դատավոր Արտուշ Գաբրիելյանը բավարարեց պաշտպանի միջնորդությունը եւ փոխեց Արթուր Մելքոնյանի խափանման միջոց կալանքը: Խափանման միջոց ընտրվեց չհեռանալու մասին ստորագրությունը:
Արթուր Մելքոնյանը արդեն ազատության մեջ լրագրողների հետ զրույցում ասաց, որ իրավիճակի փոփոխության հետ է կապված իր ազատ արձակումը: Իսկ հարցին, թե ինչպես կմեկնաբանի այն ձայնագրությունների հրապարակումը, որոնցում ինքն ասել է, թե կապ չունի «Սասնա ծռերի» հետ, նա ասաց, որ «Սասնա ծռերի» անդամների դուրս գալուց հետո կխոսի այդ մասին եւ ավելացրեց, որ միգուցե ոստիկանների համար ինքը կապ չունի «Սասնա ծռերի» հետ:
