Հայաստանը մտնում է զարգացման լավ փուլ, երբ քաղաքական օրենքները կսկսեն աշխատել: Այս մասին, այսօր՝ հունիսի 14-ին, «Արեւելյան գործընկերության ապագան ալեկոծ ժամանակներում» թեմայով միջազգային գիտաժողովի բացման խոսքում նշել է Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանը:
«Նախկին իշխանություններն ուզում էին հայ ժողովրդի վզին փաթաթել միտքը, թե լավ օրենքները կան, բայց դրանք հայ ժողովրդի համար չեն: Հայ ժողովուրդը պայթեցրեց այդ միտումը ու ճիշտ արեց: Այ հիմա նորմալ կզարգանա Հայաստանը»,-ընդգծեց փորձագետը:
Նրա խոսքով, Հայաստանում ընտրությունները երկար ժամանակ կեղծվում էին, եւ ժողովուրդը որոշեց անել հին հռոմեացիների նման. «Ժողովուրդը փողոցում ընտրեց Նիկոլ Փաշինյանին, ապա ուղարկեց Ազգային ժողով եւ ասաց՝ ընտրեք նրան վարչապետ: Սա շատ հետաքրքիր օրինակ է, երբ Հին Հռոմի օրինակն աշխատեց Հայաստանում: Ու երբ ժողովրդական շարժմանը միացան ՀՅԴ-ն ու «Ծառուկյանը» դա շանս տվեց, որ լրիվ օրենքով հնարավոր եղավ օրինական ճանապարհով կատարել իշխանափոխությունը: Դա ապահովեց փոփոխությունների սահմանադրականությունը»:
