Շենգավիթ վարչական շրջանի առաջին ատյանի ընդհանուր իրավասության դատարանում, դատավոր Աննա Դանիբեկյանի նախագահությամբ, այսօր՝ հունիսի 14-ին, շարունակվեց ՀՀ ոստիկանության ՊՊԾ գնդի տարածքի գրավման ժամանակ մի քանի ոստիկանների նկատմամբ վտանգավոր բռնություն գործադրելու գործով ամբաստանյալներ Սարգիս Արաբաջյանի եւ Կարեն Վանոյանի գործով դատական քննությունը:
Պաշտպան Լիպարիտ Սիմոնյանը միջնորդություն ներկայացրեց իր պաշտպանյալներ Կարեն Վանոյանի եւ Սարգիս Արաբաջյանի խափանման միջոց կալանքը փոխելու վերաբերյալ:
Մեղադրող Գ. Գեւորգյանը չառարկեց միջնորդությունը Կարեն Վանոյանի պարագայում, նշելով, որ ապացույցները հետազոտվել են, լսվել են վկաների եւ տուժողների ցուցմունքները: «Նրա ազատության մեջ գտնվելը, կարծում եմ, որ չի խանգարի արդարադատության իրականացմանը, ինչ վերաբերվում է Սարգիս Արաբաջյանին, ես առարկում եմ Լիպարիտ Սիմոնյանի միջնորդությունը, քանի որ վերջինս նախկինում եւս մեղադրվել է նմանատիպ հանցագործության մեջ»,-ասաց նա:
Դատարանը այժմ հեռացել է խորհրդակցական սենյակ՝որոշում կայացնելու:
Հիշեցնենք, որ Սարգիս Արաբաջյանին եւ Կարեն Վանոյանին մեղադրանք է առաջադրվել այն բանի համար, որ նրանք 2016թ. հուլիսի 19-ին ժամը 20:00-ի սահմաններում, Երեւան քաղաքի Մովսես Խորենացի փողոցին հարող` Գլինկա եւ Որմնադիրներ փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել ՀՀ ոստիկանության ՊՊԾ գնդի տարածքի գրավման կապակցությամբ քաղաքացիների անվտանգությունն ու հասարակական կարգի պահպանությունն ապահովող, իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:
ՀՀ քրեական օրենսգրքի 316-րդ հոդվածի համաձայն՝ իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար վտանգավոր բռնությունը՝ կապված նրանց կողմից իրենց ծառայողական պարտականությունները կատարելու հետ՝ պատժվում է ազատազրկմամբ՝ հինգից տասը տարի ժամկետով:
