Պետությունը չի նախապատրաստել հասարակությանը բարեփոխումներին: Այս մասին այսօր՝ հունիսի 14-ին, «Արեւելյան գործընկերության ապագան ալեկոծ ժամանակներում» միջազգային գիտաժողովի ժամանակ նշեց Մարդու իրավունքների պաշտպան Արման Թաթոյանը:
Նրա խոսքով, չի կարող որեւէ երկրից որեւէ փորձ մեխանիկորեն ներմուծվել ՀՀ մարդու իրավունքների պաշտպանության ոլորտ՝ առանց հաշվի առնելու մեր առանձնահատկությունները. «Բայց նաեւ սխալ է մոտեցումը, որ պետք է սպասել, մինչեւ հասարակությունը զարգանա, նոր Հայաստանում սկսվեն ոլորտային բարեփոխումները: Դրանք պետք է իրականացնել եւ հասարակությանը տանել հետեւից: Այդ առումով մենք մեր երկրում ունեցել ենք բացթողումներ, որովհետեւ եղել են քայլեր, որոնք իրականացվել են որոշակի ցնցումներով, օրինակ՝ «Ընտանեկան բռնության դեմ» ոլորտի օրենսդրությունը»,-ընդգծեց Արման Թաթոյանը:
Նա նկատեց, որ ցավոք, Հայաստանում լրագրողի աշխատանքների խոչընդոտների համար պատասխանատվության մեխանիզմը լիարժեք չի գործում. «Դրա պատճառով լրագրողների մոտ կա արդարացի մոտեցում, որ իրենց աշխատանքը պետության կողմից լիարժեք պաշտպանված չէ: Դա պայմանավորված է մի քանի խորքային պատճառներով»,-ասաց Թաթոյանը:
Նա կարծիք հայտնեց, որ անհրաժեշտ է մի քանի սկզբունքային հարցեր լուծել. «նախ պետք է մշտապես գործել լրագրողի օրինավորությունը, նրա աշխատանքի բարեխճության կանխավարկածով, ինչը շատ կարեւոր է: Կարեւոր է լրագրող գործընկերների հետ տարվող աշխատանքը, նրանց շարունակական կարողությունների զարգացման առումով»:
