Կառավարությունը մասնակիորեն ընդունեց «Լիցենզավորման մասին» օրենքում փոփոխություններ և լրացումներ կատարելու մասին», «Պետական տուրքի մասին» օրենքում փոփոխություններ կատարելու մասին» և «Վարչական իրավախախտումների վերաբերյալ օրենսգրքում փոփոխություն կատարելու մասին» օրենքների նախագծերի փաթեթի օրենքի նախագիծը, որը վերաբերում է անհատ տաքսու վարորդների լիցենզավորման պետական տուրքի չվճարման համար տույժ վճարելու պարտականությունից ազատելուն:
Նախագիծը հեղինակել էին ԱԺ ՀՀԿ–ական պատգամավորներ Խոսրով Հարությունյանը, Վահրամ Բաղդասարյանը և Գագիկ Մելիքյանը։
Ըստ նախագծի հիմնավորման՝ առաջարկվում է մարդատար տաքսի ավտոմոբիլով ուղևորափոխադրումներ իրականացնելու իրավունք ունեցող անհատ ձեռնարկատեր չհանդիսացող ֆիզիկական անձանց և տրանսպորտի բնագավառում լիցենզավորման ենթակա գործունեություն իրականացնող մյուս սուբյեկտներին ազատել պետական տուրքի չվճարման համար տույժ վճարելու պարտականությունից։
Զեկուցող արդարադատության նախարար Արտակ Զեյնալյանը նշեց, որ oրենքի նախագծով առաջարկվում է պետական տուրքի վճարումն ուշացնելու դեպքում տույժը հանել, բայց նաև որպես երաշխիք վարչական իրավախախտումների վերաբերյալ օրենսգրքում 50 հազար դրամ տուգանքը փոխարինել 100 հազարով:
«Առաջարկում ենք, որ կառավարությունը մերժի այդ օրենքի փոփոխություններին հավանություն տալու նախագիծը: Դրա վերաբերյալ առկա են ֆինանսների և արդարադատության նախարարությունների եզրակացությունները: Գտնում ենք, որ մասնավոր դեպքերի համար իրավիճակային լուծումները, առաջարկներն անընդունելի են և պրակտիկ կիրառման ընթացքում կարող են հանգեցնել լուրջ խնդիրների: Առաջարկում ենք օրենքը թողնել անփոփոխ»,- ասաց Զեյնալյանը:
Վարչապետ Նիկոլ Փաշինյանն էլ նշեց, որ օրենքի նախագծին ծանոթանալիս երկակի զգացողություններ է ունեցել: «Մի կողմից՝ առաջարկվում է տուրքի չվճարման համար ընդհանրապես տույժ չնշանակել: Մյուս կողմից՝ առաջարկվում է ինչ-որ դեպքերում տուգանքի չափերը կրկնապատկել: Այս հակասություններով հանդերձ՝ ես չհասկացա, թե ի՞նչ խնդիր է փորձ արվում լուծել այս նախագծով»,- նշեց նա:
Իր հերթին Ֆինանսների նախարար Ատոմ Ջանջուղազյանը նշեց, որ նախագծով փորձ է արվում տույժերը ներելով՝ վարորդներին օգնել վճարել գոնե տուգանքները, բայց նախագիծը համապատասխան կարգավորումներ չի տալիս:
Փաշինյանն առաջարկեց առանց լուրջ պոտենցիալ վնասների լուծել միայն նշված խնդիրը. «Այս մասնակի խնդրի այլընտրանքն առաջարկեք»:
Տրանսպորտի, կապի և ՏՏ նախարար Աշոտ Հակոբյանն էլ նկատեց, որ այս ոլորտում առկա է անհավասար դաշտ՝ օնլայն տաքսի ծառայությունների և անհատ տաքսու վարորդների մասով:
«Արձանագրենք, որ այսպիսի պրոբլեմ կա, և այդ պրոբլեմի լուծման տարբերակ առաջարկենք, այդ թվում՝ ԱԺ պատգամավորների հետ համագործակցելով»,- ասաց Փաշինյանը:
