Բարենպաստ մթնոլորտի ստեղծումը միայն նպաստում է ղարաբաղյան հակամարտության բանակցային գործընթացին: Այս մասին հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան:
Պատասխանելով հարցին՝ կարո՞ղ է արդյոք վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի հանդիպումը ԵԱՀԿ Մինսկի խմբի շրջանակներում բանակցային գործընթացի ակտիվացման հանգեցնել, Զախարովան հորդորել է չշփոթել հանդիպման ձեւաչափերը:
«Ձեւաչափերը պետք չէ խառնել. կա պետության ղեկավարների միջեւ շփման ձեւաչ, որը եւ երկկողմանի զրույց է ենթադրում, եւ՝ բազմակողմ շփումներ: Իհարկե, բարենպաստ մթնոլորտի ստեղծումը միայն նպաստում է բանակցային գործընթացին, եւ ոչ միայն նպաստում է, այլեւ լուծման կարեւորագույն գրավականն է, այդ թվում՝ ղարաբաղյան հակամարտության: Սակայն եւս մեկ անգամ ուզում եմ ասել, որ պետք չէ շփոթել ձեւաչափերը»,- նշել է նա:
Ավելի վաղ Փաշինյանը Facebook-ի իր էջում գրել էր, որ ՌԴ նախագահ Վլադիմիր Պուտինն իրեն ծանոթացրել է Ալիեւի հետ: «Ֆուտբոլային հանդիպումից հետո ՌԴ նախագահը փոքր հանդիպում էր նախաձեռնել ԱՊՀ երկրների ղեկավարների ձեւաչափով: Հանդիպմանը ներկա էր նաեւ Ադրբեջանի նախագահ Իլհամ Ալիեւը, եվ Ռուսաստանի նախագահը մեզ ներկայացրեց միմյանց: Մենք պարզապես բարեւել ենք միմյանց, քննարկում մեր միջեւ չի եղել: Առարկայական զրույց տեղի չի ունեցել»,- նշել էր Փաշինյանը:
