Հայաստանը կարեւորում է Ասիական զարգացման բանկի (ԱԶԲ) աջակցությամբ իրականացվող ծրագրերը: Այս մասին այսօր՝ հունիսի 15-ին ՀՀ տարածքային կառավարման եւ զարգացման նախարար Սուրեն Պապիկյանն ասել է ԱԶԲ-ի պատվիրակության հետ հանդիպման ժամանակ:
Սուրեն Պապիկյանը կարեւորել է ԱԶԲ-ի աջակցությամբ սեյսմիկ անվտանգության, քաղաքաշինության, կոշտ կենցաղային թափոնների կառավարման ոլորտներում ընթացիկ ծրագրերի կենսական նշանակությունն ու դրանց շարունակականությունը Հայաստանի համար՝ հավելելով, որ բանկի հետ համագործակցությունը զարգացման եւ ընդլայնման՝ դեռեւս չբացահայտված մեծ ներուժ ունի:
Բանկի հայաստանյան գրասենյակի փոխտնօրեն Սեզար Լորենսն իր հերթին շնորհավորել եւ հաջողություն է մաղթել Սուրեն Պապիկյանին ու հանգամանորեն ներկայացրել ԱԶԲ-ի աջակցությամբ իրականացվող ծրագրերի նպատակը, ակնկալվող արդյունքները, ինչպես նաև դրանք արդյունավետորեն ավարտին հասցնելու ուղղությամբ անհրաժեշտ միջոցառումները։
Հանդիպմանը պայմանավորվածություն է ձեռք բերվել, հավատարիմ մնալով համագործակցության ավանդույթին, ջանքեր գործադրել փոխադարձ հետաքրքրություն ներկայացնող և ենթակառուցվածքների արդիականացմանն ու զարգացմանը նպաստող նոր ծրագրերի և գաղափարների մշակման ուղղությամբ։
