Հունիսի 16-17-ը Հայաստանի Ամերիկյան Համալսարանում կկայանա (չ)կոնֆերանս «ԲարՔեմփ Երեւան 2018»-ը: (Չ)կոնֆերանսի նպատակը գիտելիքների, հմտությունների եւ փորձի փոխանակումը, ինչպես նաեւ ՏՏ ոլորտում նոր կապերի ստեղծումն է:
Արդեն 10 տարի է՝ ԲարՔեմփ Երեւանը մեկ հարկի տակ միավորում է ՏՏ ոլորտի հազարավոր մասնագետների:
(Չ)կոնֆերանսին այս տարի ելույթներով հանդես կգան բազմաթիվ միջազգային հյուրեր՝ Էվան Շելհամերը, Լեոնիդ Կուլիգինը կխոսեն արհեստական բանականության, Դանիել Տոնկոպիյը՝ ապագայի տրանսպորտի, Եվգենի Կալուժնին՝ փոքր հրթիռների, Իլյա Խաննիկովը՝ թռչող ավտոմեքենաների եւ սմարթ քաղաքների մասին, Գրեգորի Պետրովը, Ֆիլիպ Կրենը՝ ծրագրավորման խնդիրների, որոնողական համակարգերի մասին, Ջոել Բըրքը՝ e-Residency-ի մասին, կներկայանա նաեւ Yandex-ի թիմը, իսկ Cloudflare-ի ամերիկյան գրասենյակից՝ Արեգ Հարությունյանը։
Այս տարի եւս «ԲարՔեմփ Երեւան 2018»-ին սպասվում են վարպետության դասեր ՏՏ ոլորտի լավագույն մասնագետների կողմից, ինչպես նաեւ աշխատաշուկա, որին մասնակցելու են տասնյակ ՏՏ ընկերություններ:
ԲարՔեմփ Երեւանի գլխավոր գործընկերը Ucom ընկերությունն է, որի համահիմնադիր եւ գլխավոր տնօրեն Հայկ Եսայանը նույնպես կներկայանա ժամանակակից ցանցերի առավելությունների մասին պատմող կարճ պրեզենտացիայով:
Հովանավորներն ու գործընկերներն են BetConstruct, Digitain, Rockbite Games, Workfront, Ginosi Apartels, SFL LLC, AVETIQ, Vineti AM ընկերությունները։
(Չ)կոնֆերանսի պաշտոնական հաշթեգն է #barcampevn18:
ԲարՔեմփը ոչ ֆորմալ մթնոլորտում բաց քննարկումներ և մտքերի ազատ փոխանակում ապահովող միջոցառման ձևաչափ է: ԲարՔեմփ Երեւան միջոցառումներն ամբողջությամբ կազմակերպվում են կամավորների ջանքերով, ովքեր հայաստանյան տեղեկատվական տեխնոլոգիաների եւ մեդիա ոլորտի ներկայացուցիչներ են: Հայաստանում ԲարՔեմփն անցկացվում է 2009 թվականից:
