ՀՀ ոստիկանապետ Վալերի Օսիպյանը վստահեցնում է՝ իրեն չի վշտացնում այն հանգամանքը, որ դատարանը բավարարում է «Սասնա ծռեր» խմբի անդամների խափանման միջոցը փոխելու միջնորդություններն ու մեկը մյուսի հետեւից ազատ արձակում նրանց։ NEWS.am-ի հետ զրույցում ոստիկանապետը հույս հայտնեց, որ դատաքննությամբ կպարզվի իրականությունը, եւ մեղավորները պատասխանատվության կենթարկվեն։ Հիշեցնենք, որ «Սասնա ծռերը» ոստիկանության ՊՊԾ գունդը գրավելիս Վալերի Օսիպյանին գնդում պահել էին պատանդի կարգավիճակում։
«Երկու տարի անցել է, կան խմբի մասնակիցներ, որոնց խափանման միջոցը փոխելու միջնորդությունը կարելի է բավարարել։ Մնացածը թող քննությամբ պարզվի, դրա համար դատաքննություն է ընթանում, եւ դատական համակարգը թող արդարադատություն իրականացնի»,- ասաց Օսիպյանը։
Ինչ վերաբերում է հանրության մի հատվածի քննադատություններին, թե արդար չէ, որ ազատ են արձակվում «Սասնա ծռերի» անդամները, որոնց գործողությունների ժամանակ ոստիկաններ են զոհվել, Օսիպյանն ասաց. «Ամեն դեպքում, որքան ես տեղեկացված եմ, զոհված ոստիկանների հետ կապ ունեցողները դեռ ազատ չեն արձակվել»։
Նշենք, որ հեղափոխությունից հետո միայն դատարանը սկսեց բավարարել «Սասնա ծռեր» խմբի անդամների խափանման միջոցը փոխելու միջնորդությունները. նրանցից 10-ն արդեն ազատության մեջ է։