Հատուկ քննչական ծառայությունը հայտարարություն է հրապարակել՝ քաղաքացիներին հորդորելով 2008 թվականի մարտի 1-ի եւ 2-ի դեպքերի մասին արժեքավոր տեղեկություններ ունեցողներին դիմել իրենց: Այս մասին տեղեկանում ենք ՀՔԾ մամուլի ծառայությունից:
Հայտարարությունում, մասնավորապես, ասվում է.
«Կարեւորելով հանրության աջակցությունն ու ակտիվ ներգրավվածությունը Երեւան քաղաքում 2008 թվականի մարտի 1-ին եւ 2-ին տեղի ունեցած դեպքերի բոլոր հանգամանքների, այդ թվում՝ 10 անձանց սպանությունների ամբողջական բացահայտման գործում` խնդրում ենք ՀՀ քաղաքացիներին նշված դեպքերի վերաբերյալ որեւէ արժեքավոր տեղեկատվություն, այդ թվում՝ տեսանյութեր, լուսանկարներ, փաստաթղթեր ունենալու դեպքում դիմել ՀՀ հատուկ քննչական ծառայություն հետեւյալ հասցեով` ք. Երեւան, Վ.Վաղարշյան 13ա, հեռ.՝ (+374) 11 900 064:
Միաժամանակ հայտնում ենք, որ անհրաժեշտության դեպքում ՀՀ քրեական դատավարության օրենսգրքի 98-րդ հոդվածով սահմանված կարգով պաշտպանության միջոցներ կկիրառվեն բոլոր այն անձանց նկատմամբ, ովքեր վերը նշված դեպքերի կապակցությամբ կարող են հայտնել հանցագործությունները բացահայտելու եւ դրանք կատարողներին հայտնաբերելու վերաբերյալ նշանակություն ունեցող տվյալներ:
Մասնավորապես, միջոցներ կձեռնարկվեն՝ քրեական դատավարությանը մասնակցող անձանց ինքնությունը հաստատող տվյալների պաշտպանության, նրանց վերաբերյալ տեղեկությունների սահմանափակման, ինչպես նաեւ իրավապահ մարմինների հետ համագործակցության միջոցով վերջիններիս անվտանգության ապահովման ուղղությամբ»:
