Պետդեպարտամենտը հերթական նախազգուշացումն է հրապարակել Հյուսիսային Կովկաս ու Ղրիմ թերակղզի ուղևորությունների վտանգավորության մասին, պնդելով, որ զբոսաշրջիկները այնտեղ կարող են դառնալ «ահաբեկչության զոհ», փոխանցում է ՏԱՍՍ-ը։
«Պետդեպարտամենտը, ինչպես և նախկինում, խորհուրդ է տալիս վերանայել Ռուսաստան ճամփորդելու ծրագրերը։ Պետք է խուսափել Հյուսիսային Կովկաս, այդ թվում Չեչնիա ու Էլբրուս սար ցանկացած ուղևորությունից, քանի որ այնտեղ կան քաղաքացիական անկարգություններ ու ահաբեկչություն։ Նաև պետք չէ այցելել Ղրիմ, քանի որ թերակղզին գտնվում է օտարերկյա օկուպացիայի տակ»,- ասվում է հայտարարության մեջ։
Ինչ վերաբերում է Ղրիմին, ապա հայտարարության մեջ կրկնվում է Վաշինգթոնի դիրքորոշումը, որը հրաժարվում է ճանաչե լ Ռուսաստանի հետ թերակղզու վերամիավորումը։ «Այնտեղ կա Ռուսաստանի Դաշնության չափազանց մեծ ռազմական ներկայություն։ Նկատվում է օկուպացիոն իշխանությունների ոչ պատշաճ վարվելաձև օտարերկրացիների ու տեղի բնակչության հետ»,- նշել է գերատեսչությունը։
