Էջմիածնի քաղաքապետ Կարեն Գրիգորյանն իր հրաժարականը պահանջող ցուցարարներին հորդորում է ավելի չլարել իրավիճակը քաղաքում եւ նստել «հաշտության նստարանին»: Այս մասին քաղաքապետն այսօր` հունիսի 16-ին ասել է լրագրողներին:
«Ես հիմա եթե փորձեմ հակառակ մեղադրանքներ հնչեցնել, ապա կստացվի, որ ես եմ սադրում, փորձեմ նաեւ զսպել այդ մեղադրանքները: Մեր քաղաքում արդեն երկար տարիներ տեղադրված է հաշտության նստարան, պարոն Արթուր Թումանյան, պարոն Հակոբ Հակոբյան, Ստեփան Աբգարյան, դուք էջմիածնեցիներ եք, խնդրեմ, եկեք հաշտության: Սա հոգեւոր կենտրոն է, չի կարելի թույլ տալ, սրել, սադրել, հասցնել Մարտի 1-ին: Չի՛ կարելի, 2 կողմն էլ ժողովուրդ կա: Հասկացանք՝ նույն քաղաքապետ ընտրելուց ինձ չի ընտրել 3.000 մարդ, ընտրել է 12.000 մարդ, էս 3.000-ը չեն ընդունում ինձ, դա նորմալ է: Բայց էդ մարդիկ դիմել են, օգնել եմ, այո, ճանաչում եմ մեծ մասին: Էդ մարդն ասում ա՝ ինձ չի ընտրել, բայց էդ մարդու տեղեկանքը տալիս եմ ժամանակին եւ անկախ նրանից՝ ինձ սիրում են, թե չեն սիրում»,- ասաց քաղաքապետը:
Կարեն Գրիգորյանը նշեց, որ իր հասցեին 20 տարվա մեղադրանքներ են հնչեցնում, այնինչ ինքն այդ ժամանակ չի պաշտոնավարել, իսկ իր դեմ բողոքներ են ներկայացնողներին խորհուրդ տվեց սպասել:
«Ժողովուրդ, դիմել ես՝ սպասի, ասում եք՝ վստահում եք ժողովրդի քվեով ձեւավորված կառավարությանը, է՝ խնդրեմ, դիմել եք ստուգումներ անելու, կլինեն խախտումներ, պատասխան կտամ: Լավ հիշեք, ինչքան ես իմ սխալների համար պատասխան կտամ, էնքան էլ` դուք: Ժողովրդի խոսքով ասած՝ սա մի գոլանի ֆուտբոլ չի, սա Հայաստանի Հանրապետությունն է, որտեղ դաբրոներ գոյություն չունեն, մի դաբրո կա՝ դա ժողովրդի դաբրոն է, ուրիշ բաներ գոյություն չունեն, չկան արտոնյալներ եւ չեն էլ լինելու, ցույց տվեք, որ սիրում եք ձեր քաղաքը»,- ասաց նա: