Գերմանիան եւ Ֆրանսիան համատեղ պատասխան կտան Եվրամիության առջեւ ծառացած հիմնական մարտահրավերներին: Այս մասին շաբաթ՝ հունիսի 16-ին տեսաուղերձում հայտարարել է Գերմանիայի կանցլեր Անգելա Մերկելը, հաղորդում է DW-ն:
Խոսքը պաշտպանության եւ անվտանգության ոլորտում, ինչպես նաեւ արտաքին քաղաքականության հարցերում համատեղ քաղաքականության կառուցման մասին է:
Կանցլերը միգրացիայի խնդիրը Եվրոպայի համար եւս մեկ մարտահրավեր է անվանել, որը պահանջում է եվրոպական արձագանք: Ըստ նրա, միգրացիայի հարցը «Եվրոպայի միասնության որոշիչ գործոններից մեկն է»: ԵՄ-ի առջեւ ծառացած խնդիրները ներառում են տնտեսական եւ արժութային միության հետագա զարգացումը, ինչպես նաեւ նորարարությունների հետ կապված հարցեր:
Նա կարեւորել է Ֆրանսիայի հետ հարաբերությունները ԵՄ-ում խաղաղության պահպանման համար: Միեւնույն ժամանակ, երկկողմ հարաբերությունները պետք է թարմացվեն «բազմաթիվ փոփոխությունների լույսի ներքո», ասել է Մերկելը: