Մեծ Բրիտանիայի ներքին գործերի նախարար Սաջիդ Ջավիդը խոստովանել է, որ մի քանի ամիս առաջ դարձել է մոտոցիկլետով կողոպտիչների հարձակման զոհը, որոնք գողացել են նրա բջջային հեռախոսը: Նախարարն այս խոստովանությունը կատարել է ելույթ ունենալով The Sun պարբերականի կիրակնօրյա հարցազրույցում:
«Դա տեղի ունեցավ ակնթարթորեն: Ես գտնվում էի Յուսթոն կայարանի մոտ եւ վերցրի հեռախոսս, որ տաքսի կանչեմ: Մինչեւ գիտակցեցի, թե ինչ է տեղի ունենում, ամեն ինչ արդեն կատարվեց: Նրանք ուղղակի մոտեցան, խլեցին հեռախոսը եւ թաքնվեցին»,- պատմել է Ջավիդը:
ՆԳ նախարարը հայտարարել է միջոցառումների մասին, որոնք կոչված են բրիտանական քաղաքների փողոցներում բռնությունը արմատախիլ անելուն: Նա հանդես է գալիս համացանցում դանակների վաճառքի արգելքի, երիտասարդների շրջանում կանխարգելիչ զրույցներ անցկացնելու, ինչպես նաեւ թմրավաճառների դեմ պայքարի ուժեղացման օգտին: «Մեր փողոցները պետք է ցանկացած ժամի անվտանգ լինեն»,- շեշտել է նա:
