Հնարավոր դեպք ունենանք, որ եթե մարդը ազատ լինի, կարող է եւս 10 մարդու գնդակահարել: Այս մասին, այսօր՝ հունիսի 18-ին, ԱԺ-ում ճեպազրույցների ժամանակ նշեց «Ելք» խմբակցության պատգամավոր Էդմոն Մարուքյանը՝ անդրադառնալով ԵԿՄ նախագահ, ԱԺ ՀՀԿ խմբակցության պատգամավոր Մանվել Գրիգորյանի հետ տեղի ունեցածին, եւ մեկնաբանությանը, որ Մանվել Գրիգորյանին անձեռնմխելիությունից զրկելու հարցը կարող է քննարկվել միայն ԱԺ հերթական նիստում, որը տեղի է ունենալու սեպտեմբերի 10-ին:
Մարուքյանի խոսքով, Սահմանադրությունը նշում է, որ ԱԺ պատգամավորին անձեռնմխելիությունից զրկելու պարտադիր քննարկման հարց է. «Հետեւաբար եթե կա պատգամավոր, որը կասկածվում է հանցագործություն կատարելու մեջ եւ կա քրեական դատավարության պրոցես, այդ պրոցեսի արդյունքում չի կարող չլինել օրակարգում չընդգրկված հարց: Այս իմաստով է ԱԺ կանոնակարգ օրենքի այդ դրույթը, ոչ թե այն իմաստով, որ եթե չկա ԱԺ հերթական նիստ առաջիկա ամիսներին, ապա չենք կարող քրեական հետապնդման թույլտվություն տալ: Սա կլինի աբսուրդ: Վերանանք պարոն Գրիգորյանի գործից: Հնարավոր դեպք ունենանք, որ եթե մարդը ազատ լինի, կարող է եւս 10 մարդու գնդակահարել: Եվ ի՞նչ, պետք է խորհրդարանը սպասի հաջորդ նստաշրջանի՞ն»,-հայտարարեց Մարուքյանը:
Նա հիշեցրեց, որ երբ այս տարվա ապրիլին «Ելք»-ի պատգամավորներ Նիկոլ Փաշինյանը, Սասուն Միքայելյանը, Արարատ Միրզոյանը ձերբակալված էին եւ չկար ԱԺ հերթական նիստ, նման միջնորդություն ուղարկվել է խորհրդարան, որը պետք է քննարկվեր պատգամավորների ստորագրություններով, ոչ թե կառավարության նախաձեռնությամբ:
«Ես կզարմանամ, եթե որեւէ մեկը փորձի շահարկել ԱԺ կանոնակարգ օրենքի արտահերթ նիստերի հետ կապված դրույթը: Դա չի նշանակում, որ արտահերթ նիստում չի կարող նման հարց ընդգրկվել»,-ընդգծեց նա:
Ավելի վաղ NEWS.am-ը հայտնել էր, որ վարչապետ Նիկոլ Փաշինյանը հայտարարել էր, որ Մանվել Գրիգորյանը կասկածվում է ոչ միայն ապօրինի զենք-զինամթերք պահելու մեջ, այլեւ դպրոցականների կողմից զինծառայողների համար ուղարկված օգնությունը յուրացնելու համար: Այնուհետեւ այդ ամենը հաստատող հաղորդագրություն եւ տեսանյութ էր տարածել ԱԱԾ-ն։
Մասնավորապես, ԱԱԾ հաղորդագրության մեջ նշվում է, որ Մանվել Գրիգորյանին պատկանող հանգստյան գոտում հայտնաբերվել է «զինվորի բաժին» նշագրումով սնունդ, հիգիենիկ պարագաներ, դեղորայք, զինվորական հանդերձանք: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռեւս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր։
Հանրապետության տասնյակ մանկապարտեզներից, դպրոցներից, համայնքներից զինվորներին ուղարկված սնունդը՝ խտացրած կաթ, մակարոնեղեն, տոմատի մածուկ, պահածոյացված միս եւ բանջարեղեն, անգամ հիգիենայի պարագաներ, զուգարանի թուղթ, նույնպես պահեստավորված էին հանգստյան գոտու պահեստներում: Խուզարկությամբ հայտնաբերվեցին նաեւ պաշտպանության նախարարությանը մատակարարված «զինվորի համար» հատուկ գրությամբ մթերքներ, որոնք ենթակա չեն վաճառքի կամ այլ կարիքների համար օգտագործման:
Հիշեցնենք, որ Մանվել Գրիգորյանը ձերբակալվել է նրա ամառանոցում ապօրինի զենք, ռազմամթերք հայտնաբերելու փաստի առթիվ հարուցված քրեական գործի շրջանակներում: Քրեական գործը հարուցվել է ՀՀ Քրեական օրենսգրքի 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 2-րդ մասի հատկանիշներով։
Ավելի ուշ հայտնի դարձավ, որ Վաղարշապատի (Էջմիածին) քաղաքապետ, Մանվել Գրիգորյանի որդի Կարեն Գրիգորյանը հրաժարական է տվել։
Մանվել Գրիգորյանին պատկանող հանգստյան գոտում ԱԱԾ խուզարկության մանրամասները տեսանյութով
