Նախօրեին ԱԺ պատգամավոր Մանվել Գրիգորյանի տանը եւ նրան պատկանող տարածքներում խուզարկություններ են տեղի ունեցել եւ առանց որեւէ մեկի անմեղության կանխավարկածը խախտելու, ուզում եմ արձանագրել, որ գործ ունենք Երրորդ Հանրապետության պատմության մեջ ամենամեծամասշտաբ կոռուպցիոն արտահայտման հետ: Այս մասին, այսօր՝ հունիսի 18-ին, կառավարության արտահերթ նիստի սկզբում հայտարարեց ՀՀ վարչապետ Նիկոլ Փաշինյանը:

Նրա խոսքով, այս գործն առանձնանում է նրանով, որ բացահայտումները ցնցող ու շոկային են հայ հանրության համար. «Ես շնորհակալություն եմ հայտնել ԱԱԾ տնօրենին, նաեւ խնդրել եմ շնորհակալության խոսքերը փոխանցել ԱԱԾ աշխատակիցներին: Բոլորս էլ հասկանում ենք, որ այս գործողությունը մեկ օրում չի կազմակերպվել, դրան նախորդել է ծավալուն աշխատանք, որի ընթացքում նաեւ որոշակի օրակարգ ենք ձեւակերպել, որը վերաբերում է նաեւ իրավապահ համակարգի փոխգործակցության խնդիրներին:

Ես առաջիկա օրերին խորհրդակցություն կհրավիրեմ այս թեմայով, որ այս հարցում հստակեցումներ մտցնենք եւ զարգացնենք իրավապահ համակարգի փոխգործակցության մակարդակը»,-հայտարարեց Փաշինյանը:

Նա հույս հայտնեց, որ այս գործի քննությունը կընթանա պատշաճ մակարդակով. «Գործ ունենք կոռուպցիոն մեծամասշտաբ երեւույթի հետ: Գործը հանձնվել է ՀՔԾ-ին, եւ հույս ունեմ, որ գլխավոր դատախազությունը կապահովի քննության պատշաճ մակարդակը: Ոչ ես, ոչ հայ հանրությունը չենք տեսնում որեւէ խոչընդոտ, որ այս գործի բոլոր մասնակիցները բացահայտվեն եւ պատասխանատվության կանչվեն՝ անկախ նրանց կոչումներից, կարգավիճակներից եւ այլ հարակից հանգամանքներից: Այս գործը պետք է բացահայտվի մինչեւ վերջ, ոչ մի խոչընդոտ չկա ու չի կարող լինել: Կոռուպցիայի հետ ոչ մի կոմպրոմիս չի լինելու, Կոռուպցիան ՀՀ-ից արմատախիլ է արվելու, թող ոչ ոք չկասկածի, որ դրան հասնելու ենք»,-ընդգծեց վարչապետը:

Նա նկատեց, որ հիմա արդեն կարող են փաստացի արձանագրել, որ տարիներ շարունակ պնդումները, թե երկիրը սիստեմատիկ կերպով թալանվել է, հիմնավորվում են եւ թալանի բոլոր մասնակիցները պետք է բացահայտվեն եւ պատասխանատվության կանչվեն:

Ավելի վաղ NEWS.am-ը հայտնել էր, որ ԱԱԾ-ն տեսանյութ է տարածել, որտեղ երեւում է, որ ԱԺ ՀՀԿ խմբակցության պատգամավոր Մանվել Գրիգորյանի հանգստի գոտու տարածքում հայտնաբերվել են սնունդ, դեղորայք, հիգիենիկ պարագաներ, որոնք ուղարկված են եղել դպրոցականների կողմից ապրիլյան պատերազմի մասնակիցներին:

Մասնավորապես, ԱԱԾ հաղորդագրության մեջ նշվում է, որ Մանվել Գրիգորյանին պատկանող հանգստյան գոտում հայտնաբերվել է «զինվորի բաժին» նշագրումով սնունդ, հիգիենիկ պարագաներ, դեղորայք, զինվորական հանդերձանք: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռեւս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր։

Հանրապետության տասնյակ մանկապարտեզներից, դպրոցներից, համայնքներից զինվորներին ուղարկված սնունդը՝ խտացրած կաթ, մակարոնեղեն, տոմատի մածուկ, պահածոյացված միս եւ բանջարեղեն, անգամ հիգիենայի պարագաներ, զուգարանի թուղթ, նույնպես պահեստավորված էին հանգստյան գոտու պահեստներում: Խուզարկությամբ հայտնաբերվեցին նաեւ պաշտպանության նախարարությանը մատակարարված «զինվորի համար» հատուկ գրությամբ մթերքներ, որոնք ենթակա չեն վաճառքի կամ այլ կարիքների համար օգտագործման:

Հիշեցնենք, որ Մանվել Գրիգորյանը ձերբակալվել է նրա ամառանոցում ապօրինի զենք, ռազմամթերք հայտնաբերելու փաստի առթիվ հարուցված քրեական գործի շրջանակներում: Քրեական գործը հարուցվել է ՀՀ Քրեական օրենսգրքի 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 2-րդ մասի հատկանիշներով։

Ավելի ուշ հայտնի դարձավ, որ Վաղարշապատի (Էջմիածին) քաղաքապետ, Մանվել Գրիգորյանի որդի Կարեն Գրիգորյանը հրաժարական է տվել։

Մանվել Գրիգորյանին պատկանող հանգստյան գոտում ԱԱԾ խուզարկության մանրամասները տեսանյութով