Երբեմն տպավորություն եմ ստանում, որ մեր իրավապահ համակարգի որոշ կառույցներ դադարի վիճակում են: Այս մասին, այսօր՝ հունիսի 18-ին, կառավարության արտահերթ նիստի սկզբում հայտարարեց ՀՀ վարչապետ Նիկոլ Փաշինյանը:
«Նրանց թվում է, որ կոռուպցիան արմատախիլ անելու մասին հայտարարությունները կարող են շարքային հայտարարություններ լինեն, ժամանակը կանցնի եւ բոլորը կմոռանան, թե ինչի համար էին հավաքվել: Ես չգիտեմ, թե ով կմոռանա, ով չի մոռանա, բայց ես չեմ մոռանա: Ես հույս ունեմ, որ իրավապահ համակարգը լրջորեն կմտածի կոռուպցիայի դեմ պայքարի իր արդյունավետությունը բարձրացնելու մասին, եւ մենք ստիպված չենք լինի այս թեմային մի քանի անգամ անդրադառնալ: Մենք այս թեմային կանդրադառնանք առաջիկայում այս թեմայով հրավիրվելիք խորհրդակցության ընթացքում եւ դա այդ ֆորմատով կլինի մեր վերջին խոսակցությունը, որից հետո կակնկալենք կոնկրետ արդյունքներ»,-հայտարարեց Փաշինյանը:
Նա ընդգծեց, որ բացարձակ կարեւոր չէ, թե ով կհանդիպի կոռուպցիայի դեմ պայքարի ճանապարհին իրենց. «Բացարձակ կարեւոր չէ, թե ինչ կարգավիճակ ու կոչում կունենա: Բոլորը հավասար են օրենքի առջեւ եւ օրենքի խնդիրն է դա իրագործել»:
Նշենք, որ Կառավարությունում արտարհերթ նիստ է ընթանում, որի օրակարգում ԱԺ ՀՀԿ խմբակցության պատգամավոր Մանվել Գրիգորյանին անձեռնմխելիության հարցով ԱԺ արտահերթ նիստ հրավիրելու հարցն է:
Ավելի վաղ NEWS.am-ը հայտնել էր, որ ԱԱԾ-ն տեսանյութ է տարածել, որտեղ երեւում է, որ ԱԺ ՀՀԿ խմբակցության պատգամավոր Մանվել Գրիգորյանի հանգստի գոտու տարածքում հայտնաբերվել են սնունդ, դեղորայք, հիգիենիկ պարագաներ, որոնք ուղարկված են եղել դպրոցականների կողմից ապրիլյան պատերազմի մասնակիցներին:
Մասնավորապես, ԱԱԾ հաղորդագրության մեջ նշվում է, որ Մանվել Գրիգորյանին պատկանող հանգստյան գոտում հայտնաբերվել է «զինվորի բաժին» նշագրումով սնունդ, հիգիենիկ պարագաներ, դեղորայք, զինվորական հանդերձանք: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռեւս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր։
Հանրապետության տասնյակ մանկապարտեզներից, դպրոցներից, համայնքներից զինվորներին ուղարկված սնունդը՝ խտացրած կաթ, մակարոնեղեն, տոմատի մածուկ, պահածոյացված միս եւ բանջարեղեն, անգամ հիգիենայի պարագաներ, զուգարանի թուղթ, նույնպես պահեստավորված էին հանգստյան գոտու պահեստներում: Խուզարկությամբ հայտնաբերվեցին նաեւ պաշտպանության նախարարությանը մատակարարված «զինվորի համար» հատուկ գրությամբ մթերքներ, որոնք ենթակա չեն վաճառքի կամ այլ կարիքների համար օգտագործման:
Հիշեցնենք, որ Մանվել Գրիգորյանը ձերբակալվել է նրա ամառանոցում ապօրինի զենք, ռազմամթերք հայտնաբերելու փաստի առթիվ հարուցված քրեական գործի շրջանակներում: Քրեական գործը հարուցվել է ՀՀ Քրեական օրենսգրքի 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 2-րդ մասի հատկանիշներով։
Ավելի ուշ հայտնի դարձավ, որ Վաղարշապատի (Էջմիածին) քաղաքապետ, Մանվել Գրիգորյանի որդի Կարեն Գրիգորյանը հրաժարական է տվել։
Մանվել Գրիգորյանին պատկանող հանգստյան գոտում ԱԱԾ խուզարկության մանրամասները տեսանյութով
