Ղարաբաղը չի կարող իրեն զանգվածային ցույցերի անցկացման շքեղություն թույլ տալ: Այս մասին հունիսի 18-ին լրագրողների հետ հանդիպման ժամանակ հայտարարեց «Ժառանգություն» կուսակցության վարչության նախագահ Արմեն Մարտիրոսյանը:
Անդրադառնալով Ղարաբաղում տիրող ներքաղաքական իրավիճակին, Արմեն Մարտիրոսյանը նշեց, որ այստեղ բողոքների ալիքներ կարող են բարձրանալ, սակայն զանգվածային բողոքներն ու ամենուրեք երթեւեկության կաթվածահար վիճակն անթույլատրելի են: «Ի տարբերություն Հայաստանի, Ղարաբաղում կարելի է արագորեն հասնել ներքին համաձայնության, եւ ես հուսով եմ, որ այսպիսի պայմանավորվածության արդյունքում քաղաքացիների փողոցային ակտիվությունը կվերաճի կառավարման համակարգի»,- ասաց Մարտիրոսյանը:
Խոսելով շփման գծում տիրող իրավիճակի մասին, նա նշել է, որ հայկական կողմը ցանկացած պահի պետք է պատրաստ լինի ռազմական գործողություններին՝ մի պարզ պատճառով, որ Ադրբեջանը հենց այնպես չի կուտակում ուժերը սահմանին: «Ակնհայտ է, որ եթե Ադրբեջանում սոցիալ-տնտեսական վիճակի վատթարացման եւ ներքաղաքական ֆորս-մաժորային իրավիճակի դեպքում ռազմական գործողությունները նախագահ Իլհամ Ալիեւին պաշտպանելու լավագույն միջոցը կդառնան»,- ասաց «Ժառանգություն» կուսակցության ղեկավարը:
