ՀՀ պաշտպանության փոխնախարար Գաբրիել Բալայանը չի ցանկանում մեկնաբանել ԱԺ ՀՀԿ խմբակցության պատգամավոր Մանվել Գրիգորյանին պատկանող տարածքներում Ազգային անվտանգության ծառայության (ԱԱԾ) իրականացրած խուզարկության արդյունքում արված բացահայտումները:
«Կատարվում է նախաքննություն, ես ձեռնպահ կմնամ որեւէ մեկնաբանություն անելուց»,- լրագրողների հետ զրույցում ասել է Գաբրիել Բալայանը՝ հավելելով, որ քննչական մարմինների բարեփոխումներից հետո:
Բալայանը դիտել է ԱԱԾ-ի հրապարակած տեսանյութը. ասում է՝ զգացողությունները նույնն են, ինչ ամբողջ հասարակության մոտ: «Ես Մանվել Գրիգորյանին ճանաչում եմ 14 տարեկանից: Այդ ժամանակ նա Հաթերքի անտառներում պարտիզանական ջոկատի հրամանատար էր: Ես էլ էի այդ ժամանակ այնտեղ: Ինչպես ամբողջ հասարակությունը, միեւնույն զգացողությունները նաեւ ինձ մոտ են: Շատ ցավալի է, մանավանդ, որ ես Մանվել Գրիգորյանին ճանաչում եմ որպես պարտիզանական հրամանատար»,- ընդգծել է Բալայանը:
Իսկ հարցին, թե ի՞նչ մեխանիզմներով կարող էր զինվորի սնունդը հայտնվել Մանվել Գրիգորյանին պատկանող տարածքներում, Բալայանը պատասխանեց, որ չի ցանկանում որեւէ վարկած առաջադրել: «Քանի որ Երկրապահ կամավորական միությունը նաեւ իրականացրել է մարտական հերթապահություն, ենթադրում եմ, որ նրանց կարող է որոշակի ապրանքատեսակներ մատակարարված լինել: Մեր կողմից սխալ կլինի վարկածներ առաջադրել: Նախաքննություն է իրականացվում, Ազգային անվտանգության ծառայությունը նախաքննական մարմին է, իսկ պաշտպանության նախարարությունում այլեւս քննչական գործողություններ իրականացնող մարմին գոյություն չունի»,- նշել է պաշտպանության փոխնախարարը: