Ճապոնիայի Օսակա պրեֆեկտուրայում տեղի ունեցած հզոր երկրաշարժից հետո մեկ օրում 26 անգամ գրանցվել են կրկնվող ստորգետնյա ցնցումներ, հայտնել է Ճապոնիայի գլխավոր օդերեւութաբանական վարչությունը, փոխանցում է «ՌԻԱ Նովոստի»-ն:
Դրանցից 4 անգամ՝ 4 բալ հզորությամբ ցնցումներ ըստ Ճապոնիայում ընդունված 7-բալանի սանդղակի:
Օդերեւութաբանները զգուշացրել են, որ այս շրջանում մեկ շաբաթ հնարավոր են հզոր ստորգետնյա հետցնցումներ: Հզոր ցնցումների հավանականությունն առանձնապես մեծ է առաջին 2-3 օրերին:
2016 թվականին Կումամոտոյում տեղի ունեցած երկրաշարժի ժամանակ հիմնական վնասը եւ առավել մեծ թվով զոհերը գրանցվել էին երկրորդ երկրաշարժից հետո: Այն իր հզորությամբ առաջինին գրեթե չէր զիջում (ապրիլի 14-ին 7-բալանի սանդղակով 7 բալ, ապրիլի 16-ին՝ 6+), սակայն ճակատագրական եղավ նրանց համար, ովքեր վերադարձել էին աղետի հարվածից արդեն տուժած իրենց տներ:
Հիշեցնենք, որ Օսակա պրեֆեկտուրայի հյուսիսային հատվածում երկուշաբթի 7.58-ին տեղի է ունեցել 6,1 մագնիտուդով հզոր երկրաշարժ: Մի շարք շրջաններում ցնցումների հզորությունը հասել է Ճապոնիայում ընդունված 7-բալանի սանդղակով 6 բալի: Այս պահի տեղեկություններով՝ կա 4 զոհ, 360 տուժած:
