Թաիլանդում 2009 թվականից սկսած ի կատար է ածվել հանցագործի առաջին մահապատիժը, երեքշաբթի հայտնել է Ազգային 3-րդ հեռուստաալիքը, փոխանցում է «ՌԻԱ Նովոստի»-ն:
Մահացու ներարկմամբ մահապատիժը կատարվել է նախօրեին Բանգոկի Բանգ Կուանգ կենտրոնական բանտում, նշված է հաղորդագրության մեջ:
Մահապատժի ենթարկված հանցագործը Թաիլանդի 26-ամյա քաղաքացի է, որը դատապարտվել էր 2012 թվականին 17-ամյա ուսանողուհու դաժան սպանության համար, ում հասցրել էր 24 դանակահարված: Նա հանցագործության վայրից փախուստի էր դիմել՝ սպանվածի դրամապանակով եւ բջջայինով, սակայն մի քանի ժամ անց ոստիկանները նրան կալանավորել էին: Առաջին ատյանի դատարանը մարդասպանին մահապատժի էր դատապարտել, որն այնուհետեւ հաստատել էին Թաիլանդի վերաքննիչ եւ գերագույն դատարանները:
Թաիլանդի արդարադատության նախարարության պատիժների իրականացման եւ ուղղիչ դեպարտամենտի տվյալներով՝ 1935 թվականին, երբ 1932-ին բացարձակ միապետության վերացումից հետո ուժի մեջ մտավ ներկայումս գործող քրեադատավարական օրենսգիրքը, Թաիլանդում մահապատժի է ենթարկվել 326 մարդ: Մինչեւ 2003 թվականը երկրում կիրառվում էր գնդակահարությամբ մահապատիժը: Գնդակահարելու համար օգտագործում էին գնդացիր, որը հաստոցի վրա այնպես էր ամրացված, որ փամփուշտները խոցեին դատապարտյալի սիրտը: Գնդացիրը գործի էր դրվում մի քանի կոճակներով էլեկտրական մեխանիզմի միջոցով, որոնք միաժամանակ սեղմում էին դեպարտամենտի մի քանի աշխատակիցներ: Մահապատժի ժամանակ թե կոնկրետ որ կոճակն էր միացնում էլեկտրական ցանցը, նրանցից եւ ոչ մեկը չգիտեր:
Թաիլանդում 2003 թվականի դեկտեմբերին գնդակահարությունը որպես մահապատժի կատարման եղանակ փոխարինվել է մահացու ներարկմամբ: Երկրում նախորդ մահապատիժն ի կատար էր ածվել 2009 թվականին, երբ մահապատժի ենթարկվեցին միաժամանակ 2 մարդ, որոնք նման դատավճռով էին դատապարտվել առանձնապես խոշոր չափերի թմրանյութերի մաքսանենգության համար:
