Բոլորի համար սա շոկ է, որովհետեւ Մանվել Գրիգորյանը լինի, թե ցանկացած այլ անձ, նման արարք թույլ տալը ժողովրդի եւ պետականության նկատմամբ դավաճանություն է։ Այս մասին այսօր՝ հունիսի 19-ին լրագրողների հետ զրույցում ասաց ՀՀԿ խմբակցության պատգամավոր Գեւորգ Կոստանյանը։
Նրա խոսքով՝ հաշվի առնելով անմեղության կանխավարկածի անվերապահ կիրառությունը, դեռ հնարավոր չէ իրավական գնահատականի արժանացնել կոնկրետ արարքը կամ կոնկրետ անձի կողմից կատարվածը։ «Ես վստահ եմ, որ ես եւ իմ գործընկերները Հանրապետական խմբակցությունում առնվազն կողմ ենք քվեարկելու անձեռնմխելիությունից զրկելուն, այսինքն՝ քրեական հետապնդում իրականացնելուն համաձայնություն տալուն»,- ասաց Կոստանյանը։
Ըստ պատգամավորի՝ այդ արարքն անթույլատրելի է եւ այլ կերպ, քան դավաճանություն, չի կարող բնութագրվել. «Մենք համաձայնությունը կտանք՝ առնվազն հնարավորություն տալով նախաքննության մարմնին քննություն իրականացնել, ի հայտ բերել բոլոր մեղավոր անձանց եւ պատասխանատվության ենթարկել, միաժամանակ, մենք դրանով հնարավորություն կտանք Մանվել Գրիգորյանին, որ այդ նախաքննության ընթացքում հնարավորություն ունենա ապացուցել իր անմեղությունը, եթե այդ հնարավորությունից առավելագույնս օգտվի։ Ես անձամբ միանշանակ կողմ եմ քվեարկելու, եւ ես վստահ եմ, որ Հանրապետական խմբակցությունը նույնպես կողմ կքվեարկի այդ պատճառով»։
Կոստանյանը վստահ է, որ երբ իրականացվի քննությունը, ի հայտ կգան մեղավոր անձինք եւ պատասխանատվության կենթարկվեն։ «Հանրապետական խմբակցությունը սրանով ցույց է տալիս, որ շահագրգիռ է, որպեսզի ցանկացած անձ, ով երբեւէ ոտնձգություն անի մեր բանակի նկատմամբ, մեր անձեռնմխելիությանը, մեր զորքին եւ զինվորին, անկախ նրանից, ով է այդ անձը, պետք է խստագույնս պատժվի»,- նշեց ՀՀԿ-ական պատգամավորը։
Ընթանում է ԱԺ արտահերթ նիստը. օրակարգում Մանվել Գրիգորյանի հարցն է (ուղիղ)