Ոչ ոք ինձ չի կաշկանդել իմ գործողություններում: Այս մասին, այսօր՝ հունիսի 19-ին, ԱԺ-ում լրագրողների հետ զրույցում նշեց ՀՀ գլխավոր դատախազ Արթուր Դավթյանը:
«Մենք ունենք մի իրավիճակ, երբ քաղաքացիներից աջակցության ակնկալիքն է մեծացել եւ ունենք դրա ռեալ դրսեւորումները: Դրանով է պայմանավորված, որ եւ նոր հանցագործությունների բացահայտման հնարավորությունն ենք բարձր գնահատում, եւ նախկինում կատարված, չբացահայտված հանցագործությունների: Մենք հիմա ականատես ենք լինում, որ նախկինում նախկին վարույթներով հարցաքննվել են, չեն համագործակցել վարույթն իրականցնող մարմինների հետ, հիմա պատրաստ են համագործակցել»,-հայտարարեց Արթուր Դավթյանը:
Հարցին, թե դա ինչով է պայմանավորված, նա արձագանքեց. «Սրա բացատրության իրավական հիմքը չկա, բայց բոլորիդ էլ քաջ հայտնի է, որ վերջին զարգացումներով պայմանավորված հանրային ակնկալիքները գործերի բացահայտումների մասով մեծացել են: Հանրությունը պահանջատերը դառնալով, գնահատեց, որ ինքն էլ պետք է մասնակիցը լինի»:
Ինչ վերաբերում է «Մարտի 1»-ի գործին, գլխավոր դատախազն ասաց, որ այդ գործով եւս իրենց սպասումները շատ են. «Առաջիկայում այդ գործով ունեցած մեր տեղեկությունների մասով պարբերաբար հաշվետու ենք լինելու հանրությանը, եթե իհարկե դրանք չեն խոչընդոտի բացահայտմանը: Հենց լինեն ռեալ արդյունքներ, կհրապարակենք»:
Հարցին, թե հնարավո՞ր է նախկին պաշտոնյաներ ձերբակալվեն, այդ թվում հարցաքննվի Ռոբերտ Քոչարյանը, դատախազը պատասխանեց. «Ում վերաբերյալ կլինեն հիմքեր, համոզված եղեք, որ նրանց նկատմամբ կկիրառվեն օրենքով սահմանված գործողություններ, այդ թվում հարցաքննություններ, հարկադրանքի միջոցներ»: