ՀՀԿ խմբակցության պատգամավոր Շուշան Պետրոսյանը, որն օրեր առաջ ապացույցներ էր պահանջում Մանվել Գրիգորյանի արարքի վերաբերյալ, այսօր՝ հունիսի 19-ին, ԱԺ-ում լրագրողների հետ զրույցում հայտարարել է, թե կորցրել է իր հերոսին:
Շուշան Պետրոսյանն ասել է, թե իր համար անհավատալի էր բացահայտվածը, իսկ ինքն անձամբ է մարդկանց հանգանակությունը հասցրել զինվորին:
«Մենք բոլորս սիրում ենք զինվորին, մի հատ լուռ բան կա զինվորի հանդեպ: Ես էլ եմ մտածում՝ դա ոնց կարար լինել... դա ինձ համար շոկային էր, ես կորցրեցի իմ հերոսին»,-ասել է Շուշան Պետրոսյանը:
Նշենք, որ խորհրդարանը այսօր համաձայնություն տվեց, որ Մանվել Գրիգորյանի նկատմամբ քրեական հետախպնդում իրականացվի եւ նա կալանավորվի:
Ավելի վաղ NEWS.am-ը հայտնել էր, որ Մանվել Գրիգորյանը ձերբակալվել է հունիսի 16-ին՝ Ազգային անվտանգության ծառայության խուզարկություններից հետո ապօրինի կերպով զենք եւ ռազմամթերք պահելու համար: Ազգային անվտանգության ծառայության նախօրեին տարածած տեսանյութի համաձայն, Հանրապետական պատգամավոր, գեներալ Մանվել Գրիգորյանի տանն ու նրան պատկանող տարածքներում հայտնաբերվել են մեծ քանակությամբ ռազմամթերք ու թանկարժեք մեքենաների հավաքածուներ, ինչպես նաեւ երկու տարի առաջ՝ ապրիլյան պատերազմի ժամանակ, բանակին որպես օգնություն ուղարկված շտապօգնության մեքենա, սնունդ, հագուստ ու այլ իրեր: