Սուրբ հողում գտնվող երեք՝ հայ, կաթոլիկ եւ հույն ուղղափառ եկեղեցիների ներկայացուցիչները կոչ են արել վարչապետ Բենիամին Նեթանյահուին կանխել Երուսաղեմի հողերի սեփականազրկության մասին օրինագծի ընդունումը:
Երեք եկեղեցիների ղեկավարներն Իսրայելի իշխանություններին մեղադրում են մի քանի ամիս առաջ հնչեցրած խոստման չկատարման համար: Նեթանյահուին ուղղված նամակում նրանք քննադատել են «սկանդալային օրինագիծը» եւ մեղադրել փաստաթղթի կողմնակիցներին՝ Սուրբ հողում քրիստոնյաների վրա աննախադեպ հարձակման համար, հաղորդում է AFP-ն:
Ըստ նրանց՝ չնայած նրան, որ կառավարությունը փոխզիջում գտնելու համար հատուկ աշխատանքային խումբ էր նշանակել՝ նախարար Ցահի Հանեգբիի գլխավորությամբ, եկեղեցիների հետ «երկխոսություն չի տարվել»:
Հիշեցնենք, որ փետրվարին երեք օրով փակվել էին Աստծո գերեզմանի տաճարի դռները՝ որպես քաղաքապետարանի՝ եկեղեցու գույքի համար հարկ սահմանելու մտադրության դեմ բողոքի նշան: Իսրայելի իշխանությունները համաձայնել են այս հարցով երկխոսության գնալ, ինչպես նաեւ ընդառաջել եւս մի վիճահարույց հարցով՝ սառեցնելով Երուսաղեմում հողի սեփականազրկության մասին օրինագիծը: