Բնապահպանության ոլորտում Հայաստանի եւ Ճապոնիայի երկարամյա համագործակցությունը կայուն հիմքերի վրա է, ինչը լավագույն նախապայմանն է հետագա շարունակական սերտ համագործակցության եւ համատեղ նոր ծրագրեր իրականացնելու համար: Այս մասին ՀՀ բնապահպանության նախարար Էրիկ Գրիգորյանն ասել է այսօր՝ հունիսի 19-ին Հայաստանում Ճապոնիայի նորանշանակ արտակարգ եւ լիազոր դեսպան Ջուն Յամադայի հետ հանդիպմանը:
Նկատելով, որ որոշ բնապահպանական խնդիրների լուծման գործում Ճապոնիան առաջնային դերակատարություն ունի՝ Էրիկ Գրիգորյանն անդրադարձել է, մասնավորապես, սնդիկի դեմ պայքարին, որի շրջանակում Հայաստանն ստորագրել եւ վավերացրել է Մինամատայի կոնվենցիան: Նախարարը հույս է հայտնել, որ նորանշանակ դեսպանի դիվանագիտական առաքելության ժամանակահատվածում հայ-ճապոնական հարաբերությունները բնապահպանության ոլորտում նոր մակարդակի կբարձրանա՝ դառնալով առավել ակտիվ ու լայնածավալ:
Դեսպանը գոհունակությամբ շեշտել է, որ իր պաշտոնավարման սկիզբը համընկել է Հայաստանի նոր կառավարության ձեւավորման հետ եւ համոզմունք հայտնել, որ հետագա համագործակցությունն արդյունավետ կլինի։ Նա նաեւ կարեւորել է բնապահպանական մարտահրավերներին դիմակայելը, որոնք վերջին շրջանում համամարդկային բնույթ են ստացել, եւ հայտնել է իր երկրի պատրաստակամությունը՝ կիսվելու այդ ուղղությամբ ունեցած լավագույն փորձով:
Ջուն Յամադան ներկայացրել է նախորդ 1960-ական թվականներին Ճապոնիայի ունեցած բնապահպանական խնդիրները, որոնք հնարավոր է եղել հաղթահարել պետության եւ բիզնեսի համագործակցության շնորհիվ:
Անդրադարձ է եղել նաեւ «Կանաչ կլիմայական հիմնադրամի» շրջանակում երկու երկրների համագործակցության հնարավորություններին՝ նկատի ունենալով, որ Ճապոնիան հիմնադրամի հիմնական դոնոր պետություններից է:
