Ոստիկանության 6-րդ գլխավոր վարչության աշխատակիցների անցկացրած ստուգումները անկանկալ չէին «Էլլիպս» ընկերության համար: Այս մասին այսօր՝ հունիսի 20-ին, լրագրողների հետ զրույցում ասել է «Էլլիպս» ընկերության տնօրենի խորհրդական Արամ Ղլեչյանը:
«Ոչ, անակնկալ չէր իրենց այցը, քանի որ մի քանի որ առաջ իրենք «Սեքյուրիթի դրիմ» էին այցելել, իրենց խնդրանքով մենք իրենց տրամադրել էինք հաշվապահական փաստաթղթերը, բոլոր ֆինանսական փաստաթղթերը, որոնք հիմնավորում էին «Սեքյուրիթի դրիմ» ընկերության եւ ՀՀ ՃՈ-ի միջեւ առկա ֆինանսական հարաբերությունները: Մենք շատ ըմբռնումով ենք մոտենում, որ եթե կան կասկածներ, թեկուզ մեր խորին համոզմամբ, անհիմն, մենք պատրաստ ենք աջակցել, որպեսզի իրավապահ մարմինները եւս համոզվեն, որ մեր գործելաոճը եղել է բացառապես օրենքի շրջանակներում»,-ասաց նա՝ հավելելով, որ իրենք բոլոր փաստաթղթերը ներկայացրել են, որպեսզի համապատասխան ստուգումներ անցկացվեն:
Արամ Ղլեչյանը մանրամասնեց, որ կասկածները կապված են գրանցված, փաստացի աշխատակիցների եւ կատարված վճարումների հետ:
«Կասկածներն այն էին, որ 500 աշխատակիցներից մի մասը չկան, անուններ են, որոնց դիմաց վճարումներ են կատարվել եւ այդ հաշիվները ներկայացվել են ՃՈ-ին: Մենք բնականաբար տրամադրել ենք անվանական ցանկը բոլոր մեզ մոտ առկա տվյալներով եւ այդ տվյալները համադրելի են ՀՀ համապատասխան մարմիններում առկա տվյալների հետ, փոխանցումները բացառապես անկանխիկ են իրականացվել: Տեղյակ ենք, որ իրականացվում են դիտումներ, թե այդ մարդիկ այցելում են աշխատանքի, թե՝ ոչ, բնականաբար տհաճ է, բայց փորձում ենք ըմբռնումով մոտենալ, թող ստուգեն, համոզվեն»,-ասաց նա:
Ավելի վաղ հայտնել էինք, որ ոստիկանության 6-րդ գլխավոր վարչության աշխատակիցներն գործողություններ են իրականացնում «Էլլիպս» ընկերությունում: Ընկերության տնօրենն էլ մեզ հետ զրույցում ասել է, որ սովորական ստուգում է, ինքը մտահոգություններ չունի այդ առթիվ եւ նախկինում էլ են եղել նման մտահոգություններ:
