News
Լրահոս
News
Հինգշաբթի
Դեկտեմբեր 13
Տեսնել լրահոսը

Հայաստանում տեղի ունեցող փոփոխությունները ֆրանսիական նոր ներդրումներ կբերեն Հայաստան: Այս մասին, այսօր՝ հունիսի 20-ին, Ֆրանսիայի Հանրապետության Ազգային ժողովի Ֆրանսիա-Հայաստան պատգամավորական բարեկամական խմբի նախագահ Ժակ Մարիլոսյանի գլխավորած պատվիրակության հետ հանդիպման ժամանակ նշել է ՀՀ վարչապետ Նիկոլ Փաշինյանը:

Վարչապետի գրասենյակից NEWS.am-ին հայտնում են, որ վարչապետը նշել է, որ հայ-ֆրանսիական առանձնահատուկ հարաբերություններում իր մեծ դերն ունի խորհրդարանական դիվանագիտությունը եւ հույս հայտնել, որ այսուհետ եւս միջազգային տարբեր հարթակներում խորհրդարանական պատվիրակությունների միջեւ երկկողմ համագործակցությունը կշարունակի խորանալ:

Նիկոլ Փաշինյանը հիշեցրել է, որ մեր երկիրն անցում է կատարել խորհրդարանական կառավարման համակարգի ու այդ համատեքստում կարեւորել միջխորհրդարանական կապերի ամրապնդումը: Կառավարության ղեկավարը բարձր է գնահատել Ֆրանսիայի խորհրդարանի դերը Հայոց ցեղասպանության միջազգային ճանաչման գործում եւ հավելել, որ այն նպաստում է նաեւ ցեղասպանությունների կանխարգելմանն ու մարդու իրավունքների պաշտպանությանը:

Ժակ Մարիլոսյանն ուրախությամբ է նշել, որ Հայաստանում գտնվելու արդեն առաջին իսկ օրը զգացել են մեր երկրում տեղի ունեցող դրական փոփոխությունների շունչը, այդ թվում՝ գործարար միջավայրի բարելավման ուղղությամբ: Ըստ նրա, այդ մասին են վկայել նաեւ ՀՀ-ում գործունեություն ծավալող ֆրանսիական ընկերությունների ներկայացուցիչները: Ֆրանսիացի խորհրդարանականները տեղեկացրել են, որ ֆրանսիական տարբեր ընկերություններ հետաքրքրված են Հայաստանում ներդրումային ծրագրերի իրականացմամբ՝ հաշվի առնելով նաեւ մեր երկրի միջոցով ԵԱՏՄ եւ իրանական շուկաներ մուտք գործելու հնարավորությունները:

«Համոզված եմ, որ տեղի ունեցող փոփոխությունները ֆրանսիական նոր ներդրումներ կբերեն Հայաստան: Օտարերկրյա որեւէ ներդրող մեր երկրում որեւէ խնդիր չպետք է ունենա եւ պետք է գործի հավասար դաշտում: Գիտակցում ենք այն մեծ պատասխանատվությունը, որն ստանձնել ենք ժողովրդի առաջ ու այդ առումով ակնկալում ենք նաեւ մեր արտաքին գործընկերների աջակցությունը, որոնք շահագրգռված են Հայաստանում ժողովրդավարության եւ տնտեսության զարգացմամբ»,- ասել է Նիկոլ Փաշինյանը՝ համոզմունք հայտնելով, որ այդ գործընկերների թվում է նաեւ Ֆրանսիան: Կառավարության ղեկավարն անդրադառնալով աշնանը Երեւանում կայանալիք Ֆրանկոֆոնիայի գագաթնաժողովին՝ վստահություն է հայտնել, որ այն կանցկացվի բարձր մակարդակով:  

Զրուցակիցները քննարկել են տնտեսության, կրթության, մշակույթի եւ այլ ոլորտներում հայ-ֆրանսիական հարաբերությունների ընդլայնմանը վերաբերող մի շարք հարցեր:

Ֆրանսիական պատվիրակության անդամների խնդրանքով վարչապետ Փաշինյանն անդրադարձել է կառավարության առաջնահերթություններին, այդ թվում՝ կոռուպցիայի դեմ պայքարի, հարկային, մաքսային վարչարարության պարզեցման, տեղեկատվական տեխնոլոգիաների, գյուղատնտեսության, զբոսաշրջության զարգացմանն ուղղված քայլերին:   

Անդրադառնալով ղարաբաղյան հակամարտությանը՝ վարչապետն ընդգծել է, որ այն պետք է լուծվի բացառապես խաղաղ ճանապարհով եւ շեշտել համապատասխան մթնոլորտի ստեղծման անհրաժեշտությունը:

!
Այս նյութը հասանելի է նաև   Русский
Տպել
Կարդացեք նաև
Ամբողջը
Հայաստանին կայուն բարենպաստ ներդրումային միջավայր է անհրաժեշտ. Անդրեյ Բաբկո
Շարունակելով ներդրումների արտահոսքի մասին նախկինում արված մեկնաբանությունը, նա հավելեց, որ խոսքը զանգվածային լուրջ երեւույթի մասին չէ...
ԱՄԷ-ի գործարար հատվածի վստահությունը Հայաստանում ներդրումների ավելացմանն է հանգեցրել. ԱՄԷ դեսպան
Իր ողջույնի խոսքում Հայաստանում Արաբական Միացյալ Էմիրությունների դեսպան Ջասիմ Մուհամմեդ Ալ Կասիմին նշել է, որ երկրների միջեւ...
Ռուսական միկրոֆիրմայի մակրոծրագրերը Հայաստանում․ համեստ եկամուտով խոշոր ներդրում են խոստանում
Ընկերությունն ունի 5 հիմնադիր, որոնց թվում է նաև Սերգեյ Սոպինը, որին ընդունել են Հայաստանի կառավարությունում․․․
Պենտագոնը նեդրում է կատարում սուպեր-զիվորների համար էկզոկմախքների մեջ
Բացի այդ, էկզոկմախքը ստեղծողները հավաստիացնում են, որ այն անփոխարինելի է․․․
Հայաստանի ղեկավարության հայտարարությունները ներդրումների համար վատ ֆոն են ստեղծում. Զատուլին
Հույս ունենք, որ Հայաստանի նոր խորհրդարանը եւ կառավարությունն ավելի կառուցողական կլինեն, որ հայ-ռուսական հարաբերությունները կզարգանան…
Ներդրումներ բերելու համար Հայաստանը պետք է կարգավորի հարաբերությունները գործընկերների հետ․ «Օրինաց երկիր»
Անհրաժեշտ է ստեղծել աշխատատեղեր աշխատանքի արժանապատիվ վարձատրությամբ, ոչ թե փակել եղածը․․․
Partner news