Կուտակային կենսաթոշակների մասին օրենքի հետ կապված խնդիրները չեն վերացել: Այս մասին, այսօր՝ հունիսի 21-ին, կառավարության շենքի դիմաց լրագրողների հետ զրույցում նշեց Տնտեսական զարգացման եւ ներդրումների նախարար Արծվիկ Մինասյանը:
«Դուք լսել եք վարչապետի հայտարարությունը, որ պարտադիր կուտակայինի հարցն օրակարգում է: Մենք առաջիկայում մանրամասն վերլուծության պետք է ենթարկենք համակարգը եւ ներկայացնենք առաջարկություն: Հիմա ժամանակավոր լուծում է տրված, որպեսզի թեթեւացվի այն անձանց բեռը, որոնք պարտադիր կուտակային համակարգում են:
Վերլուծությունները ցույց կտան, թե ինչ լուծումներ կլինեն: Իմ համոզումն այն է, որ դեռեւս Սահմանադրության համապատասխանության հարցն օրակարգում է եւ պետք է մանրամասն ուսումնասիրության ենթարկվի»,-հայտարարեց դաշնակցական նախարարը:
Հարցին, թե այս հարցով կառավարության նախորդ նիստում իր եւ վարչապետ Նիկոլ Փաշինյանի միջեւ եղած լարվածությունը հարթվե՞լ է, Արծվիկ Մինասյանն արձագանքեց. «Ես դա լարվածություն չեմ բնութագրի, աշխատանքային առողջ քննարկում է, ինչը նաեւ բավական օգտակար է, որովհետեւ հարցադրումները, որ կան հասարակության մոտ, բարձրաձայնվում է: Չափազանց կարեւոր է, որ վարչապետի վերջին խոսքը, որ այս հարցն քննարկման օրակարգում է, ես համարում եմ այդ նիստի հիմնական ձեռքբերումը եւ ուղերձ հասարակությանը, որ հարցը փակված չէ»:
Նրա խոսքով, քանի դեռ պարտադիր կուտակայինը պահպանվում է, ՀՅԴ-ն հայտարարել է, որ հետապնդելու է այս հարցը, քանի դեռ վստահելի համակարգ չի ձեւավորվել: